QROSSMEYSTER NAMİQ QULİYEV BEYNƏLXALQ TURNİRDƏ 2-Cİ YERİ BÖLÜŞDÜRMÜŞDÜR
Vyana, 23 avqust (AZƏRTAC). Avqustun 15-dən 23-dək Vyanada 16-cı “Vyana Beynəlxalq Açıq Şahmat Turniri” keçirilmişdir. İsveçrə sistemi üzrə keçirilən və 9 turdan ibarət turnirdə ölkəmizi Azərbaycan şahmat məktəbinin yetirməsi, qrossmeyster Namiq Quliyev təmsil etmişdir.
On üç qrosmeyster və 22 beynəlxalq ustanın iştirak etdiyi bu mötəbər yarışda 375 şahmatçı gücünü sınamışdır.
Reytinqinin yüksəkliyinə görə (ELO 2555) turnirə 4-cü yerdə başlayan N.Quliyev ikinci turda uğursuzluğa düçar olsa da, sonrakı altı turda bütün rəqiblərini məğlub edərək 7 xal toplamış və 8-ci turdan sonra yarış cədvəlində ikinci yerdə qərarlaşmışdır.
Sonuncu (9-cu) turda N.Quliyev yarış cədvəlinə 7,5 xalla başçılıq edən Misir şahmatçısı, beynəlxalq usta Sami Şoker ilə qarşılaşmışdır. Görüş heç-heçə başa çatmış və həmyerlimiz 7,5 xalla ikinci yeri bölüşdürmışdür.
Xatırladaq ki, həmyerlimiz bu turnirdə artıq ikinci dəfə çıxış edirdi. N.Quliyev 2006-cı ildə bu beynəlxalq yarışda 2-ci və 3-cü yerləri bölüşdürmüşdü.
Elgün Niftəliyev
AZƏRTAC-ın xüsusi müxbiri
Vyana
######
Bölmənin digər xəbərləri
