SİYASƏT
Qüdrət Nuriyev: Qalib gənclik öz liderinə həmişə sadiq və minnətdardır!
Bakı, 8 noyabr, AZƏRTAC
44 günlük Vətən müharibəsində Azərbaycanın qazandığı tarixi Qələbədən iki il ötür. İkinci Qarabağ müharibəsi Azərbaycan tarixinə yeni bir səhifəni- Zəfər Gününü qızıl hərflərlə həkk etdi. Vətən müharibəsində gənclərimizin nümayiş etdirdiyi böyük qəhrəmanlıq bir vətənpərvərlik məktəbidir. Hər birimizin vətəndaşlıq borcu odur ki, bu məktəbi öyrənək, şahidlərimizin xatirəsinə hörmətlə, qazilərimizə diqqət və qayğı ilə yanaşaq.
Bu sözləri AZƏRTAC-a açıqlamasında Azərbaycan Alpaqut Federasiyasının prezidenti Qüdrət Nuriyev deyib.
“Vətən müharibəsində həlledici rolu olan Azərbaycan gənclərinin yenilməz gücü, Vətən sevgisi, torpağa bağlılığı hər kəsi heyran etdi. Dövlət başçısı İlham Əliyevin qeyd etdiyi kimi, güclü Azərbaycan hamımızın qürur mənbəyidir. Torpaqlarımızın azad edilməsində bütün nəsillərin nümayəndələri uğurlu fəaliyyət göstərib, ancaq döyüşdə iştirak edənlərin mütləq əksəriyyəti 2003-cü ildə uşaq olanlardır. Onlar yetişdi, onlar vətənpərvərlik və fədakarlıq göstərərək canlarından keçdilər, şəhid oldular, qazi oldular, qəhrəmanlıq göstərdilər və tarixi ədaləti bərpa etdilər.
Bu gün hərtərəfli inkişaf etmiş gənclərimizin ən mötəbər yarış, tədbirlərdə ölkəmizi yüksək səviyyədə təmsil etmələri bir daha bu həqiqəti ortaya qoyur ki, vətənpərvər, el-obasını, xalqını sevən hər bir azərbaycanlı ölkəmizin daha da güclənməsinə, beynəlxalq nüfuzunun artmasına öz töhfəsini verməyə böyük səy göstərir. 44 günlük Vətən müharibəsində dəmir yumruq kimi birliyimiz dünyaya səs saldı. Vətənə sevgi, düşmənə nifrət hissi ilə yetişən gənc nəsil torpağımızı işğalçılardan azad etdi”, - deyə Qüdrət Nuriyev vurğulayıb.
Federasiya rəsmisi bildirib ki, ürəyində Vətən sevgisi olan hər bir vətənpərvər azərbaycanlı müstəqil Azərbaycan Respublikasının vətəndaşı olması ilə fəxr edir. Cəmiyyətin hər sahəsində gənclərimiz böyük nailiyyətlər qazanır, ölkəmizin inkişafına böyük töhfə verirlər. Beynəlxalq arenalarda yüksək nailiyyətlər qazanan gənclərimiz Azərbaycan Respublikasının Dövlət Himnini səsləndirir, bayrağını yüksəklərdə dalğalandırır, Azərbaycanın dövlət müstəqilliyini, xalqımızın maraqlarını hər şeydən üstün tuturlar.
“Bu gün qalib Azərbaycan gəncləri Zəfər Gününü xüsusi hiss və qürurla qeyd edirlər. Sabaha qəti addımlarla və cəsarətlə addımlayan Azərbaycan gənclərinin güclü Lideri var. Qalib gənclik öz Liderinə, Müzəffər Ali Baş Komandan İlham Əliyevə həmişə sadiq və minnətdardır!”, - deyə Qüdrət Nuriyev əlavə edib.