Qurban bayramı ilə əlaqədar Şəkidə iki ünvanda heyvanların kəsimi və satışı həyata keçirilir
Şəki, 20 iyul, Mustafa Dadaşov, AZƏRTAC
Qurban bayramı ilə əlaqədar iyulun 20-də ölkənin müxtəlif bölgələrində, o cümlədən Şəki şəhərində iki ünvanda qurbanlıq heyvanların kəsimi və satışı məntəqələri fəaliyyətə başlayıb. Kənd Təsərrüfatı Nazirliyi və Qida Təhlükəsizliyi Agentliyinin təşkilatçılığı, Şəki Şəhər İcra Hakimiyyətinin dəstəyi ilə təşkil olunan heyvan kəsimi və satışı yerlərində sifarişçilərə baytar nəzarətindən keçmiş və sanitar-gigiyenik tələblər gözlənilməklə kəsilmiş qurbanlıq heyvanlar təqdim olunur.
AZƏRTAC-ın bölgə müxbiri Şəki şəhərinin Mikayıl Müşfiq küçəsində yerləşən “Halal Kəsim” MMC-yə məxsus kəsim məntəqsində olub, qurbanlıq heyvanların kəsimi işinin təşkili ilə maraqlanıb.
Məntəqədə qurbanlıq heyvanların kəsimi baytarlıq nəzarəti altında şəriət qaydalarına uyğun şəkildə həyata keçirilir.
Qida Təhlükəsizliyi Agentliyinin (AQTA) Şəki Regional bölməsinin rəisi Murad Əsədov AZƏRTAC-ın bölgə müxbirinə bildirib ki, heyvan kəsimi fəaliyyətinin tənzimlənməsi haqqında Azərbaycan Respublikası Prezidentinin müvafiq Sərəncamına əsasən, ölkə ərazisində heyvan kəsimi xüsusi ayrılmış yerlərdə, ixtisaslaşmış məntəqələrdə aparılmalıdır. AQTA tərəfindən Qurban bayramı ilə əlaqədar bütün kəsim məntəqələrində heyvan kəsimi və diri heyvanların satışı ilə bağlı metodiki təlimatlar işlənib hazırlanıb. Təlimata uyğun olaraq, bayramdan 3-4 gün əvvəl bütün kəsim məntəqələrində və satış yerlərində dezinfeksiya işləri aparılıb, işçilər koronavirus infeksiyasına qarşı peyvənd olunub. Bayram günlərində müvafiq qurumlarla birgə ərazidə, kəsim məntəqlərində baytarlıq nəzarəti təşkil edilib.
Qurumun rəsmisi bildirib ki, Qurban bayramı ilə əlaqədar Şəki şəhərindəki “Halal Kəsim” MMC-yə məxsus kəsim məntəqəsinə gətirilən heyvanlar əvvəlcə baytar həkimi tərəfindən müayinə olunur, heyvanın sağlamlığı müəyyənləşdirilir. Sonra heyvan kəsim məntəqəsinə buraxılır. Kəsildikdən sonra heyvan cəmdəkləri baytar həkimi tərəfindən təkrar müayinə olunur. Müayinə və baytarlıq ekspertizası aparıldıqdan sonra cəmdəkdə hər hansı bir xəstəlik aşkar olunmazsa, ona baytarlıq ekspertiza aktı, heyvanın sağlamlığına dair arayış verilir.
Şəki Dövlət Aqrar İnkişaf Mərkəzinin nümayəndəsi Tacəddin Bayramovun sözlərinə görə, Qurban bayramı ilə əlaqədar təşkil olunan heyvan kəsimi və satışı yerləri baytarlıq-sanitariya və gigiyena normalarının tələblərinə cavab verir. Qurbanlıq heyvanların kəsimi və satışı müvafiq qurumların nümayəndələrinin nəzarəti altında həyata keçirilir. Məntəqələrdə göstərilən xidmətlər əhali tərəfindən razılıqla qarşılanır.
Qafqaz Müsəlmanları İdarəsinin Şəki-Oğuz bölgəsi üzrə qazısı Hacı Kamran Məmmədov da qurbanlıq heyvanların kəsimi prosesini izləmək üçün məntəqəyə gəlib. Bölgə qazısı AZƏRTAC-ın bölgə müxbirinə müsahibəsində deyib: “Bu gün Qurban bayramıdır. Tanrıya şükürlər olsun ki, Zəfər, Qələbə ilindən sonra ilk Qurban bayramını qeyd edirik. Heyvan kəsimləri pandemiya dövrünün tələblərinə, şəriət qaydalarına uyğun şəkildə həyata keçirilir. Tanrı kəsilən bütün qurbanları qəbul etsin!”.
AQTA-nın bölgə nümayəndəliyindən verilən məlumata görə, bayramın ilk günündə, iyulun 20-də günorta saatlarınadək Şəki şəhərindəki heyvan kəsimi məntəqəsində xırdabuynuzlu heyvanlarla yanaşı, 15 baş iribuynuzlu heyvanın kəsimi aparılıb.
Həmin gün Şəki-Zaqatala bölgəsinin digər rayonlarında fəaliyyət göstərən kəsim məntəqlərində də qurbanlıq heyvanların kəsimi həyata keçirilib.
Bölmənin digər xəbərləri
