Rabatda Azərbaycan-Mərakeş əlaqələrinin tarixinə həsr olunmuş seminar keçirilib
Rabat, 11 oktyabr, AZƏRTAC
Mərakeş Krallığının paytaxtı Rabat şəhərində “Mərakeş-Azərbaycan münasibətləri: Tarix və çağırışlar” adlı seminar keçirilib.
AZƏRTAC xəbər verir ki, ölkəmizin Mərakeşdəki səfirliyinin, V Məhəmməd Universitetinin, Mərakeş-Azərbaycan Dostluq Cəmiyyətinin birgə təşkilatçılığı ilə keçirilən tədbirdə Cəmiyyətin üzvləri, ekspertlər, alimlər və jurnalistlər iştirak ediblər.
Seminarda Azərbaycan ilə Mərakeş arasında əlaqələrin tarixinə və hazırkı vəziyyətinə nəzər salınıb, perspektivlər barədə danışılıb.
Tədbirdə çıxış edən İbn Zöhr Universitetinin müəllimi Casim Salah ölkələrimiz arasında möhkəm siyasi əlaqələrin mövcud olduğunu bildirib, iki dövlət arasında viza tələbinin ləğvinin iqtisadi mübadiləni intensivləşdirəcəyinə, birbaşa xarici investisiyaları stimullaşdıracağına və sərmayədarların fəaliyyətini asanlaşdıracağına, eləcə də turizmi təşviq edəcəyinə inandığını deyib. Yeni viza rejiminin sahibkarlıq subyektləri arasında, həmçinin kənd təsərrüfatı, sənətkarlıq və informasiya texnologiyaları kimi sektorlarda əməkdaşlığa yol açacağına inam ifadə edilib. Bu kontekstdə iqtisadi əməkdaşlıq üzrə birgə komitənin, ticarət mübadiləsini asanlaşdırmaq üçün virtual platformaların yaradılmasının, informasiya texnologiyaları, təhsil və bərpaolunan enerji kimi mühüm sektorlarda əməkdaşlıq imkanlarının axtarılıb tapılmasının əhəmiyyəti vurğulanıb.
Casim Salah diqqətə çatdırıb ki, viza tələbinin qarşılıqlı şəkildə aradan qaldırılması Mərakeş ilə Azərbaycan arasında ikitərəfli münasibətlərdə yeni mərhələnin başlanğıcıdır, iqtisadi və ticarət mübadiləsinin inkişafı üçün yeni perspektivlər vəd edir. Bu əməkdaşlıq qarşılıqlı etimada və ortaq mənafelərə əsaslanan iqtisadi tərəfdaşlığın nümunəsinə çevrilə bilər.
Azərbaycanın Mərakeşdəki səfiri Nazim Səmədov çıxış edərək ölkələrimiz arasında mövcud olan yüksək səviyyəli diplomatik münasibətlərin tarixindən danışıb, qəbul edilmiş ikitərəfli proqramlar çərçivəsində iqtisadi, siyasi və mədəniyyət sahələrində əməkdaşlıq üçün atılmış mühüm addımlar barədə məlumat verib.
Diplomat, həmçinin vurğulayıb ki, viza tələbinin qarşılıqlı ləğvi ticarət mübadiləsinin və iqtisadi əməkdaşlığın dərinləşməsinə töhfə verəcək. İki dövlət arasında birbaşa hava xəttinin açılması və turist səfərlərinin artırılması üçün layihələr hazırlanıb.
Daha sonra tədbir iştirakçılarının fikirləri dinlənilib, suallar cavablandırılıb.
Azərbaycan-Mərakeş Dostluq Cəmiyyətinin sədri Məhəmməd Fakiri iki ölkə arasında inkişaf edən elmi-mədəni əlaqələrə toxunub, burada qarşılıqlı səfərlərin, birgə tədbirlərin və akademik əməkdaşlıq üzrə razılaşmaların rolundan danışıb. O, Azərbaycan və Mərakeş universitetləri arasında tələbə-müəllim mübadiləsi üzrə bağlanmış əməkdaşlıq memorandumunun əhəmiyyətini qeyd edib.
Seminar çərçivəsində noyabrda Bakıda keçiriləcək COP29 tədbiri ilə bağlı təqdimat edilib. İqtisadçı Rizvan Həmdi çıxışında bu beynəlxalq tədbiri xüsusilə maliyyələşmə və beynəlxalq əməkdaşlıq məsələlərində əvvəlki müzakirələri davam etdirmək üçün mühüm platforma kimi qiymətləndirib.
Jurnalist Həsən əl-Yusifi iqlim dəyişikliyi mövzusunun işıqlandırılmasında və məlumatların geniş kütləyə çatdırılmasında, bu sahədə ictimai rəyin formalaşdırılmasında medianın roluna diqqət çəkib, eyni zamanda, bu zaman qarşıya çıxan çağırışlara toxunub.
Tədbirin sonunda iştirakçılar Azərbaycan ilə Mərakeş arasında diplomatik, mədəni və sosial əlaqələrin tarixinin mərhələlərini əks etdirən fotosərgi ilə tanış olublar.
Bölmənin digər xəbərləri
