Rafael Hacıbəyli: Azərbaycan gəncliyi bu gün seçkilərdə xüsusi fəallığı ilə seçilir
Bakı, 7 fevral, AZƏRTAC
“Fəxr edirik ki, ərazi bütövlüyü və suverenliyi tam bərpa olunan Azərbaycanın bütün guşələrində bu gün prezident seçkiləri keçirilir. İctimai həyatın hər bir sahələrində aktiv fəaliyyət göstərən qalib ölkənin qalib gəncliyi də bu gün seçkilərdə xüsusi aktivliyi ilə seçilir”.
Bu sözləri AZƏRTAC-a açıqlamasında Azərbaycan Respublikası Gənclər Təşkilatları Milli Şurasının (NAYORA) sədri Rafael Hacıbəyli deyib.
O bildirib ki, gənclərimiz bu seçkidə həm seçici, həm müşahidəçi, həm də könüllü kimi iştirak edir. Gənclərimiz dövlətçilik ənənələrini daim uca tutur, çoxşaxəli dövlət islahatlarının həyata keçirilməsində yaxından iştirak edirlər. Gənclərin mənəvi inkişafı, vətənpərvərlik tərbiyəsi, xarici ölkələrdə təhsili, sosial müdafiəyə ehtiyacı olanların problemlərinin həlli istiqamətində görülən işlər, gənclər təşkilatlarının formalaşması və inkişafı üçün yaradılan şərait və imkan bu sahəyə böyük diqqətin nəticəsidir: "Ölkəmizin bütün bölgələrində keçirilən seçkilərdə artıq səhər saatlarından vətəndaşlarımızın iştirakı ilə bağlı gənc müşahidəçilərimiz tərəfindən izdiham müşahidə olunub. Seçicilərin tam demokratik və şəffaf mühitdə keçirilən seçkilərdə fəal iştirakının canlı şahidiyik”.
Bölmənin digər xəbərləri
