Rəmzi Ələkbərov: Əsas hədəfim insanlara təbəssüm bəxş etməkdir
Bakı, 19 sentyabr, G.Alıyeva, AZƏRTAC
AZƏRTAC Azərbaycanın məşhur blogerləri ilə müsahibələr silsiləsini davam etdirir. Növbəti həmsöhbətimiz bloger, stend-up komediyaçısı Rəmzi Ələkbərovdur.
Rəmzi Ələkbərov Azərbaycanda uğurlu bloger və gülüş ustalarından biridir. O, videolarında hər gün rastlaşdığımız insanların - istər qonşu, istər sərt xasiyyəti olan əmi, istərsə də təsadüfi yoldan keçənlərin canlı obrazlarını yaradır. Rəmzi AZƏRTAC-ın müxbiri ilə söhbətində necə uğur qazanmasından bəhs edib, komediya ustası olmaq istəyənlərə bəzi məsləhətlər verib.
- Rəmzi, bloqunuza nə ilə başladınız?
- Blogerlik fəaliyyətimə hələ 2014-cü ildə, qısa videolar çəkdiyim vaxtlarda başlamışam. Mən o vaxt tələbə idim, musiqi təhsili alsam da, həmişə stand-up və komediyaya həvəs göstərirdim. Bu janrda özümü sınamaq istəyim vardı. Nəticələr əvvəlcə birmənalı olmasa da, səhnədə çıxış etməyə davam etdim. Bu on il ərzində çox şey dəyişdi və mən indi sosial mediada əvvəlkindən daha çox fərqlənirəm.
- Videolarınız üçün ideyalar necə yaranır? Bu kortəbii prosesdir, yoxsa əvvəlcədən düşünülmüş strategiya?
- İdeyalar çox vaxt gündəlik həyatda müşahidələr nəticəsində yaranır. Hər gün qarşılaşdığımız vəziyyətlərdə ilham mənbəyi tapıram. Parodiyalar müxtəlif ola bilər: bəzən tanıdığınız birindən, bəzən də tamamilə yad adamlardan. Mənim vəziyyətimdə bunlar ümumiyyətlə gündəlik həyatda gördüyüm insanların - satıcılar, yoldan keçənlər, taksi sürücüləridir (onların yaşlı və ya gənc olmasının fərqi yoxdur). Onları müşahidə edirəm və bu insanlara məxsus xüsusiyyətləri tamaşaçılara çatdırmağa çalışıram. Nəticədə tamaşaçılarda maraq yaradıram, çünki onlar hər gün qarşılaşdıqları hadisələrin parodiyasına tamaşa edirlər. Təbii ki, bəzən ideyalarım tükənir və sonra aktiv şəkildə yeni personajlar axtarmağa başlayıram. Amma elə olur ki, gözlənilmədən arzulanan obraz yaranır və sonra uğurlu parodiya alınır.
- Yaradıcılıq böhranlarının və ideya tükənməsi sindromunun öhdəsindən necə gəlirsiniz?
- Bəzən emosional və yaradıcılıq baxımından özünü çarəsiz hiss edirsən. Belə vaxtlarda sadəcə görünmək üçün video çəkməməyə çalışıram. Bəzən ara vermək və özünü bərpa etmək üçün müəyyən vaxta ehtiyacın olur. Belə ki, 10-15 gün video çəkməyə bilərsən və bu müddət ərzində yeni ideyalar axtarırsan. Başınız gündəlik işlərdən ayıldıqda, yeni fikirlər və obrazlar daha asan gəlir.
- Stand-up komediya üslubunda fəaliyyətiniz necə başladı? Səhnədə gücünüzü sınamağa sizi ruhlandıran hansı amillər oldu?
- İlk stand-up çıxışım tələbəlik illərinə, məzun olduğum vaxtlara təsadüf edib. Onda mən artıq parodiyalarımla tanınırdım və təşkilatçılar məni bir tədbirə dəvət etdilər. Çıxış üçün 15 dəqiqə vaxt verildi və o vaxtdan bu, mənim yaradıcılıq həvəsimə çevrildi. Həmin tamaşa məndə fəaliyyətimə etmək istəyi yaratdı və bundan sonra müntəzəm olaraq səhnəyə çıxmağa başladım.
- Stand-up üçün hansı mövzular sizə daha yaxındır?
- Həmişə çox müşahidəçi insan olmuşam. Elə indi də, bizim söhbətimiz əsnasında artıq zehni olaraq parodiya üçün istifadə oluna biləcək obrazlar qururam. İnsanların davranışlarında incə detallara diqqət yetirirəm və bəzən bir jestdən onların səsinin necə olacağını deyə bilirəm. Bu müşahidələr sayəsində obrazlarım stereotip görünmür, əksinə, maraqlı olur.
- Çəkiliş və məzmun üzərində iş prosesindən sonra necə dincəlir və enerjinizi bərpa edirsiniz?
- Sükutu və tənhalığı sevirəm. Bəzən yeni mövzular, obrazlar yaradaraq gecə saatlarına qədər işləməyə davam edirəm. Amma hər kəsdə olduğu kimim, mənə də enerjimi bərpa etmək, dostlarla ünsiyyətdə olmaq üçün vaxt lazımdır. Tamaşaçıların sevgisi və diqqəti də mənə böyük ilham verir. İndi də yaradıcılığımdan danışanda dincəlirəm. Yaradıcılığımla bağlı fikirlərimi bölüşmək mənim üçün böyük sevincdir.
- Ölkəmizdə blogerliyin vəziyyətini necə qiymətləndirirsiniz?
- Məncə, ölkəmizdə bu sahə çox yaxşı inkişaf edir. Tez-tez başqa blogerlərin mənim haqqında düşünmədiyim mövzulara toxunduqlarını görürəm və zənn edirəm ki, bu, vacib cəhətdir. Hər bir blogerin öz üslubu və təqdimatı var ki, bu da məzmunu rəngarəng və maraqlı edir. Sosial şəbəkələrin inkişafı ilə blogerlərin böyüməsi və yaradıcılıq perspektivləri baxımından daha çox imkanlar yaranır.
- Sizcə, gələcəkdə, təxminən 10 ildən sonra blogerlik necə olacaq?
- Düşünürəm ki, gələcəkdə insanlar daha da qısa videoformatlara can atacaqlar, çünki müasir tamaşaçı getdikcə səbirsiz olur. Onlar məlumatı tez və asanlıqla, sözün əsl mənasında bir neçə saniyə ərzində qəbul etmək istəyirlər. Ola bilsin ki, biz tamaşaçılarla qarşılıqlı əlaqə üçün fərqli format təklif edəcək yeni sosial platformaların inkişafını müşahidə edəcəyik. Bununla belə, klassik videoməzmun indi olduğu kimi gündəmdə qalacaq, lakin çox güman ki, dəyişəcək.
- İlham aldığınız sevimli komediyaçılar və ya yumoristlər varmı?
- Uşaqlıqda Mister Bin rolunu oynayan Roan Etkinson, Şaban obrazını yaradan Kemal Sunal kimi aktyorlara heyran idim. Onlar sadə hərəkətlər və jestlərlə belə sizi güldürməyi bacarırdılar. Bu aktyorların komediya istedadı məni çox heyran etdi, amma heç vaxt onları olduğu kimi təqlid etmədim. Parodiyalarım tamaşaçılar üçün unikal və maraqlı olsun deyə, özümə məxsus nəsə yaratmaq mənim üçün çox vacibdir.
- Komediya ustası olmaq istəyənlərə və videoblogerlərə nələri məsləhət görərdiniz?
- Əsas odur ki, kreativ olasınız və müsbət enerji daşıyan məzmun yaradasınız. Əlbəttə ki, müasir tendensiyaları izləmək həmişə vacibdir, lakin mən sizə klassikləri də unutmamağı məsləhət görürəm. Keçmişdən qalan nəyisə yenidən yaratmaq yeni perspektiv verə və izləyiciləri sevindirə bilər. Təbii ki, təcrübə əldə etməkdən və öz yolu ilə getməkdən qorxmamaq lazımdır.
- Sizcə, uğurunuzun sirri nədədir?
- Çətin məqamlarda heç vaxt təslim olmamışam və hər şeyin zamanla gələcəyinə inanmışam. İnanıram ki, hər işin öz vaxtı var və gec-tez bütün işlər öz yoluna düşəcək. İşinizi məmnuniyyətlə davam etdirə bilmək də vacibdir. Hər dəfə yeni bir video paylaşanda, özümü ilk dəfə etdiyim kimi hiss edirəm və bu, mənə əlavə enerji verir.
Mənim üçün əsas amil insanların təbəssümüdür. Əgər videolarım onların çöhrələrində təbəssüm doğurursa, onda özümü xoşbəxt hiss edirəm.
Bölmənin digər xəbərləri
