Rəsmi Tokio Moskva ilə sülh müqaviləsi bağlamaq istəyir
Bakı, 8 aprel, AZƏRTAC
Tokio Moskva ilə sülh müqaviləsi bağlamaq və ölkələr arasında ərazi mübahisəsini həll etmək istəyir.
AZƏRTAC xəbər verir ki, bu barədə Yaponiya Xarici İşlər Nazirliyinin illik məruzəsində deyilir.
“Yaponiya hökuməti adaların qaytarılması və sülh müqaviləsinin bağlanması kursuna sadiq qalmağa davam edəcək”, - deyə sənəddə bildirilir.
Məlumata görə, Yaponiyanın hakimiyyət orqanları Cənubi Kuril adalarına səyahət praktikasını bərpa etmək istəyir. Tokio, eyni zamanda, Rusiyanın Kuril adaları ərazisində hərbi potensialının artırılmasından və orada hərbi təlimlərin keçirilməsindən narahatdır. Yaponiya XİN bu cür addımların Tokionun mövqeyinə zidd olduğunu və hökumətin buna etiraz etdiyini vurğulayıb.
Hesabatda, həmçinin Yaponiyanın Rusiyaya qarşı sanksiyalar məsələsində G7 ilə əməkdaşlığı qeyd olunur. Tokio Rusiyadan enerji asılılığından, o cümlədən neft və kömür tədarükündən tədricən qurtulmağa çalışır.
Yaponiya 1855-ci il Ticarət və Sərhədlər Müqaviləsini əsas gətirərək Kuril silsiləsinin dörd cənub adasına - İturup, Kunaşir, Şikotan və Habomaiyə iddia edir. Moskva isə Cənubi Kuril adalarının II Dünya müharibəsindən sonra SSRİ-nin tərkibinə keçdiyini və Rusiyanın bu adalar üzərində suverenliyinin beynəlxalq hüquqa zidd olmadığını bildirir.
Qeyd edək ki, Cənubi Kuril adalarının sakinləri və Yaponiya vətəndaşları 1992-ci ildən bəri qarşılıqlı vizasız səyahət etmək imkanı qazanıblar. Vizasız səyahətlər 2020-ci ildə əvvəlcə koronavirus pandemiyası, sonra isə iki ölkə arasında münasibətlərin korlanması səbəbindən dayandırılıb.
Bölmənin digər xəbərləri
