RƏSSAMIN YUBİLEY SƏRGİSİ AÇILMIŞDIR

03.10.2006 [22:47]
Çap et
A⁺ A^-

AZƏRTAC xəbər verir ki, oktyabrın 3-də Mədəniyyət və Turizm Nazirliyi, Rəssamlar İttifaqı Səttar Bəhlulzadə adına mərkəzi sərgi salonunda Azərbaycanın xalq rəssamı Altay Hacıyevin anadan olmasının 75 illik yubileyi münasibətilə onun fərdi yaradıcılıq sərgisini açmışlar.

Sərgidə əsərləri təkcə ölkəmizdə deyil, bir çox xarici dövlətlətlərin muzeylərində və şəxsi kolleksiyalarında saxlanılan rəssamın boyakarlıq və qrafika janrında 50-yə yaxın əl işi nümayiş etdirilir.

Mədəniyyət və turizm nazirinin müavini Ədalət Vəliyev, Rəssamlar İttifaqı idarə heyətinin sədri Fərhad Xəlilov və başqaları mərasimdə çıxış edərək rəssamın yaradıcılığından, Azərbaycan təsviri sənətindəki xidmətlərindən danışmışlar. Vurğulanmışdır ki, Altay Hacıyevin doğulub boya-başa çatdığı ailədən 8 rəssam çıxmışdır. Diqqətə çatdırılmışdır ki, rəssam respublikamızda və xarici ölkələrdə keçirilən bir çox sərgilərin iştirakçısı olmuşdur.

Natiqlər yubiley münasibətilə görkəmli sənətkarı təbrik etmiş, ona yeni yaradıcılıq uğurları arzulamışlar.

A.Hacıyev tədbirin iştirakçılarına və təşkilatçılarına minnətdarlığını bildirmişdir.