“Rheinmetall” Latviyada yeni sursat zavodu inşa edəcək
Berlin, 25 sentyabr, AZƏRTAC
Avropanın ən böyük silah istehsalçısı “Rheinmetall” şirkəti Latviyada sursat zavodu inşa edəcək.
AZƏRTAC xəbər verir ki, şirkətin məlumatında bu barədə Hamburqda Latviyanın Baş naziri Evika Silinanın iştirakı ilə müqavilənin imzalandığı bildirilib.
İstehsal olunacaq sursat Latviya silahlı qüvvələrinin təchizatını təmin etməklə yanaşı, tərəfdaş ölkələr üçün də əlçatan olacaq. Tikintiyə 2026-cı ilin yazında başlanması və təxminən bir ildən sonra müəssisənin işə düşməsi planlaşdırılır. İllik on minlərlə 155 millimetrlik artilleriya mərmisi istehsal edə biləcək zavod üçün ölkəyə 275 milyon avro həcmində sərmayə qoyulacaq.
Qeyd edək ki, “Rheinmetall” 2024-cü ilin sonunda Litvada da müasir artilleriya mərmiləri istehsalı zavodunun tikintisi ilə bağlı sifariş alıb. Tikintisinə yaxın həftələrdə başlanacaq bu zavod həm ölçüsünə, həm də konsepsiyasına görə Latviyada nəzərdə tutulan müəssisəyə bənzəyir.
AZƏRTAC-ın xüsusi müxbiri
Berlin
Bölmənin digər xəbərləri
