Rüfət Hüseynov: Hədəfim IV İslam Həmrəyliyi Oyunlarında qızıl medal qazanmaqdır
Bakı, 5 may, AZƏRTAC
Toplanışın son mərhələsini keçirik. Qəbələdə fiziki məşqlərdən sonra hazırlığı Bakıda davam etdiririk. Son çalışmalar taktiki və texniki hazırlıq üzərində qurulub. Artıq özümün ideal formama yaxınlaşıram. Bir qədər fiziki çatışmazlığım vardı ki, onu da aradan qaldırmışam. Bu, Qəbələdəki məşqlərdən sonra mümkün oldu.
AZƏRTAC xəbər verir ki, bu sözləri Bakıda keçiriləcək IV İslam Həmrəyliyi Oyunlarında 49 kiloqram çəki dərəcəsində rinqə çıxacaq boksçumuz Rüfət Hüseynov deyib.
2014-cü ildə Nankində təşkil olunan Yeniyetmələrin Yay Olimpiya Oyunlarında qızıl medal qazanan boksçumuz İslamiadada da eyni uğuru təkrarlamaq arzusundadır. O bildirib ki, bunu reallaşdırmaqla, öz çəkisində liderliyini də qoruyacaq: “Bizim komandada hamının bir hədəfi var. Mən də onlar kimi qızıl medal arzusundayam. Düzdür, rəqiblərin kimliyi hələ dəqiqləşməyib. Çünki hazırda boks üzrə Asiya çempionatı da keçirilir. Həmin qitənin ölkələri bir komanda ilə Daşkənddə təmsil olunur. Onların digər boksçuları isə İslamiadaya gələcəklər. Ona görə də əsas rəqibimiz hesab olunan Asiya təmsilçilərinin Bakıya hansı heyətlə gələcəyini hələ bilmirik. Rəqiblərin kimliyindən asılı olmayaraq, çalışacağam ki, İslam Həmrəyliyi Oyunlarında qalib gəlməklə, bu çəkidə bir nömrə kimi mövqeyimi qoruyum”.
Bölmənin digər xəbərləri
