Rumıniya parlamenti Rusiya əleyhinə sanksiyaların pozulmasına görə cinayət məsuliyyəti tətbiq edib
Buxarest, 26 noyabr, AZƏRTAC
Rumıniya parlamenti beynəlxalq sanksiyaların, o cümlədən Rusiyaya qarşı tətbiq olunan məhdudiyyətlərin pozulmasını cinayət xarakterli hüquq pozuntusu kimi tanıyan yeni qanun dəyişikliyini qəbul edib. Deputatlar Palatası tərəfindən böyük səs çoxluğu ilə təsdiqlənən dəyişikliklər hökumətin beynəlxalq sanksiyalara dair qərarnaməsinə əlavə olunub.
Rumıniya Xarici İşlər Nazirliyinin məlumatına görə, yeni qanun layihəsi sanksiyalardan yayınma və ya onların pozulmasını ağır cinayət hesab edir və bu cür işlər Təşkilatlanmış Cinayətkarlıq və Terrorizmə Qarşı Mübarizə İdarəsinin (DIICOT) səlahiyyətinə daxil edilir. Qanunda, həmçinin sanksiyaların tətbiqi prosesində iştirak edən dövlət qurumları arasında əməkdaşlıq və koordinasiya mexanizmlərinin dəqiqləşdirildiyi bildirilir.
Sənəd fiziki və hüquqi şəxslərin sanksiyalar altında olan qurumlara dəstək göstərdiyi təqdirdə cinayət məsuliyyətinə cəlb ediləcəyini təsbit edir.
Beləliklə, Rumıniya Avropa İttifaqının sanksiyaların pozulmasına görə cinayət məsuliyyətinin tətbiqi ilə bağlı direktivini öz milli qanunvericiliyinə tam şəkildə daxil etmiş olur.
Qeyd edək ki, layihə bundan əvvəl Senat tərəfindən təsdiq edilmiş və indi son təsdiq üçün prezidentə göndəriləcək.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
