Rusiya hər zaman postsovet məkanında geosiyasi rekonstruksiyaya qarşı sərt mövqe sərgiləyib ŞƏRH
Bakı, 30 iyun, AZƏRTAC
Rusiya hər zaman postsovet məkanına öz arxa bağçası olaraq baxıb və bu məkanda yaşanan geosiyasi rekonstruksiyaya qarşı sərt mövqe sərgiləyib. Vətən müharibəsindən bəri Azərbaycanın başlatdığı hadisələr Rusiyanın əleyhinə dönməyə başladı. Birincisi, Rusiya Azərbaycanın suverenliyini bərpa etməsinə paralel olaraq Cənubi Qafqazda təsir imkanlarını itirdi. İkincisi, Azərbaycanın Şuşa Bəyannaməsi ilə strateji tərəfdaşına və hərbi ittifaq ortağına çevrilən qardaş ölkə Türkiyəyə nəinki Cənubi Qafqazda, həm də Yaxın Şərqdə məğlub oldu. Belə ki, Suriyada türkiyəyönümlü qüvvələr hakimiyyəti ələ alarkən Rusiya hərbi bazalarını oradan çıxarmalı oldu. Üçüncüsü, Azərbaycanın və Türkiyənin görünməz dəstəyi (sülh istiqamətində atılan addımlar və çağırışlar) sayəsində Nikol Paşinyan Ermənistanda hakimiyyətini qoruyub saxlamaqdadır. Yoxsa ki, 42 kilometrlik Zəngəzur dəhlizini açmaq hərbi baxımdan hazırkı şəraitdə heç də çətin olmazdı. Ermənistanın Rusiya meyilli qüvvələri, – keçmiş prezidentlər, onları dəstəkləyən diaspor nümayəndələri, xüsusilə Rusiyadakı oliqarxlar və erməni kilsəsi, – gedərək zərərsizləşdirilməkdədir və bu proses, ümumi olaraq regionda sabitliyin və sülhün bərqərar olmasına hesablansa da, Rusiyanı təbii olaraq, narahat edir.
Bu sözləri AZƏRTAC-a açıqlamasında Sosial Tədqiqatlar Mərkəzinin (STM) baş məsləhətçisi Şəhla Cəlilzadə söyləyib.
O bildirib ki, Rusiya yaxın dövrdə Ermənistanda da hərbi mövcudiyyətini itirmək təhlükəsini hiss edir. Gürcüstandakı proseslər isə daha əvvəldən başlamışdı. Lakin gürcülərin bu qədər dayanıqlı mövqe sərgiləməsində Azərbaycanın dəstəyi mühüm rol oynayıb. Xüsusilə Gürcüstanın enerji asılılığından qurtulması bu prosesdə həlledici amil olub. Azərbaycan ənənəvi qlobal enerji və nəqliyyat dəhlizlərinə alternativlər təqdim etməklə və yeni marşrutlar formalaşdırmaqla Rusiyanın regional və qlobal təsir imkanlarının zəifləməsinə töhfə verir. Bütün bu proseslərin fonunda Rusiyanın Azərbaycana qarşı təzyiqlərinin artması isə artıq açıq şəkildə müşahidə olunur.
“Ötən 6 ay ərzində Azərbaycana qarşı Rusiyanın qərəzli mövqeyi daha da artıb. Xüsusilə dövlət rəsmiləri səviyyəsində səsləndirilən qərəzli açıqlamalar, azərbaycanlılara qarşı təhdid və təhqirlər, bu günlərdə Ümumrusiya səviyyəsində anti-Azərbaycan isteriyasının pik həddə çatması ilə müşayiət olunmaqdadır. 20-25 il öncə baş verdiyi iddia olunan cinayət hadisəsinə görə Rusiyadakı azərbaycanlıların vəhşicəsinə qətlə yetirilmələri və işgəncələrə məruz qalmaları, sadəcə olaraq strateji zamanlama nəticəsində bu günlərə “təsadüf edib”. Buna cavab olaraq Azərbaycan XİN-in etirazı, Rusiya ilə əlaqədar mədəni tədbirlərin ləğvi Rusiyada kəskin reaksiya doğurub. Onlar münasibətləri bərpa etməyə deyil, Azərbaycan diasporu adından saxta paylaşımlar etməyə üstünlük verirlər. Ötən il Yekaterinburqdakı diaspor təşkilatlarımız arasında yaşanan gərginlik – parçalanma meyilləri, bəlkə də Rusiya xüsusi xidmət orqanları tərəfindən düşünülüb hazırlanmış əməliyyatın tərkib hissəsi idi?! İmperiyalar adətən “parçala və hökm sür” prinsipini üstün tuturlar”, - deyə Ş.Cəlilzadə vurğulayıb.
Onun sözlərinə görə, Rusiya AZAL təyyarəsi ilə bağlı Azərbaycanın haqlı etirazlarına qarşı çıxaraq, guya Azərbaycanın da vaxtilə Rusiya helikopterini vurduğunu, beş rus “sülhməramlısının” həlak olduğunu və buna “sakit və dözümlü” yanaşdıqlarını iddia edir. Bu arqumentlə Moskva Azərbaycandan da Rusiyaya qarşı təzyiqləri dayandırmağı tələb edir. Lakin bu müqayisə əsassızdır. Çünki həmin vaxt vurulan Rusiya helikopteri döyüş bölgəsində, erməni hərbçilərinə yardım edərkən zərərsizləşdirilmişdi. Halbuki, son hadisədə AZAL-ın sırf mülki sərnişin təyyarəsi hədəfə alınıb. Üstəlik, Azərbaycan o vaxt baş verən insidentə görə rəsmi üzr istəmişdi. Rusiya isə nə o hadisəyə, nə də indiki təxribatlara görə məsuliyyət hiss etmir və hətta vəziyyəti daha da gərginləşdirən davranış nümayiş etdirir.
“Hazırda açıq şəkildə görünür ki, Rusiya Azərbaycana qarşı diaspor və miqrant təzyiqi alətlərini işə salmağa çalışır. Sosial şəbəkələrdə Rusiyada yaşayan azərbaycanlıların deportasiyası, vətəndaşlıqdan çıxarılması, hətta bəzi ifrat dairələr tərəfindən Azərbaycana qarşı “xüsusi hərbi əməliyyat” keçirilməsi çağırışları edilir. Lakin bu istiqamətdə də uğur qazana bilməyəcəkləri aydındır. Çünki ölkəmizdə Qarabağda və Şərqi Zəngəzurda genişmiqyaslı bərpa və yenidənqurma işləri aparılır. Bu isə Rusiyada çalışan hər bir azərbaycanlı üçün doğma Vətənində iş və biznes imkanları yaradacaq.
Azərbaycan bu mövqeyi ilə Rusiyanın imperiya ənənələrinə, xalqımıza qarşı əsrlər boyu həyata keçirdiyi işğal, deportasiya, repressiya və soyqırımı siyasətinə açıq meydan oxuyur. Bu meydan oxuma təkcə ölkəmizin deyil, bütün regionun taleyində dönüş yaradacaq və Azərbaycanın Zəngəzur dəhlizi vasitəsilə dünyaya yeni qapılar açması ilə nəticələnəcək”, - deyə STM-in baş məsləhətçisi vurğulayıb.
Bölmənin digər xəbərləri
