Rusiyanı Kazan şəhərində İƏT-in Beynəlxalq Gənc Sahibkarlar Forumu keçirilir
Bakı, 15 may, AZƏRTAC
Mayın 15-də Rusiyanın Kazan şəhərində İslam Əməkdaşlıq Təşkilatı (İƏT) ölkələrinin 11-ci Beynəlxalq Gənc Sahibkarlar Forumu işə başlayıb.
AZƏRTAC xəbər verir ki, tədbir İslam Əməkdaşlıq Təşkilatı Gənclər Forumunun Avrasiya Regional Mərkəzi (İƏGF), Tatarıstanın Gənclərlə İş üzrə Nazirliyi, “Selet” Gənclər Fondu və Tatarıstan Gənclər Diplomatiyası Akademiyasının birgə təşkilatçılığı ilə keçirilir.
Forumun açılışında Tatarıstan Rəhbərinin köməkçisi Timur Süleymanov, İƏT Gənclər Forumunun Avrasiya Regional Mərkəzinin baş direktoru Rafiq İsmayılov, Çuvaş Respublikasının Batırevski bələdiyyə dairəsinin rəhbəri Rudolf Selivanov və digər rəsmi şəxslər iştirak ediblər.
Çıxış edənlər bu forumun ənənəvi xarakter daşıdığını, investisiyaların cəlb edilməsinin bir çox layihələrin uğur qazanmasına töhfə verdiyini qeyd ediblər.
R.İsmayılov təmsil etdiyi təşkilatın Tatarıstan hökuməti və Rusiyanın bu regionunun Gənclərlə İş üzrə Nazirliyi ilə əməkdaşlığından məmnunluğunu ifadə edərək bildirib ki, Kazan Forumu gənc sahibkarların təşəbbüsü ilə həyata keçirilən startap layihələrinin dəstəklənməsində mühüm rola malikdir.
Açılış mərasimindən sonra startap nümayəndələri arasında şəbəkələşmə sessiyası keçirilib, daha sonra layihələrinin ilk təqdimatları olub. Artıq 10 ildən çoxdur ki, keçirilən forumun məqsədi İƏT məkanında yeni startap təşəbbüslərini dəstəkləmək, gənc sahibkarların fəaliyyətini stimullaşdırmaq və qloballaşma şəraitində yeni biznes ideyalarının yaranmasına təkan verməkdir.
Qeyd edək ki, hər il forumun yekununda ekspertlərdən ibarət beynəlxalq münsiflər heyəti müəyyən meyarlar əsasında startap layihələrini qiymətləndirir və qalib olan təşəbbüslərin maliyyələşdirilməsi ilə bağlı qərarlar qəbul edir.
Kazan tədbirində İƏT-in müxtəlif ölkələrindən və Rusiyanın regionlarından 25 startap layihəsi təqdim edilib. Forumda işçi qrupları çərçivəsində onların qiymətləndirilməsi 3 gün ərzində başa çatdırılacaq. İştirakçılar, həmçinin mədəni proqramlarda iştirak edəcək, Tatarıstanın sahibkarlıq və startap mərkəzlərinə baş çəkəcəklər.
Bölmənin digər xəbərləri
