Rusiyanın aparıcı neft şirkətlərinin nümayəndələri ARDNŞ-nin ekologiya idarəsində olmuşlar
Bakı, 25 aprel (AZƏRTAC). Rusiyanın Neft-Qaz Biznes İnstitutunun, eləcə də qabaqcıl neft şirkətləri - “LUKoyl”, “Tatneft”, “İrkutsk Neft Şirkəti”, “TMS Qrup”, “Almeteneft”, “Bavlneft”in əməkdaşlarından ibarət nümayəndə heyəti Azərbaycan Respublikası Dövlət Neft Şirkətinin (ARDNŞ) ekologiya idarəsində olmuşdur.
ARDNŞ-in mətbuat xidmətindən AZƏRTAC-a bildirmişlər ki, şirkətin ekoloji siyasəti və ekologiya idarəsinin fəaliyyəti ilə tanışlıq məqsədi daşıyan görüşdə qonaqlara idarənin ekoloji monitorinq departamentinin fəaliyyəti barədə geniş məlumat verilmiş, müvafiq təqdimat keçirilmişdir.
Sonra qonaqlar kompleks tədqiqatlar laboratoriyasında və ekoloji mərkəzdə istifadə edilən avadanlıqlar və onların iş prosesi ilə tanış olmuşlar.
Ekoloji parkda olan nümayəndə heyəti burada parkın yaranma tarixi, yaşıllaşdırma departamentinin fəaliyyəti, habelə parkın şitilxanasında Abşeron yarımadasına adaptasiya olunmuş və adları “Qırmızı kitab”a salınmış nadir bitkilərin yetişdirilməsi metodikası barədə məlumatlandırılmışdır.
Görüşlərdə tərəflərin gələcək elmi əməkdaşlıq imkanları müzakirə olunmuşdur.
Nümayəndə heyətinin üzvləri “Qonaq kitabçası”nda təəssürat və arzularını yazmış, xatirə şəkilləri çəkdirmişlər.
Bölmənin digər xəbərləri
