MƏDƏNİYYƏT
Rusiyanın Samara vilayətində Azərbaycan Mədəniyyəti Günləri keçirilib
Bakı, 19 dekabr, AZƏRTAC
Rusiyanın Samara vilayətində Azərbaycan Mədəniyyəti Günləri keçirilib. Tədbir Azərbaycan xalqının Ümummilli Lideri Heydər Əliyevin anadan olmasının 100 illiyinə və “Samara Vilayətinin Azərbaycanlılar Liqası” İctimai Birliyinin 20 illiyinə həsr olunub.
AZƏRTAC vilayət hökumətinin saytına istinadla xəbər verir ki, Azərbaycan Mədəniyyəti Günləri çərçivəsində “Rusiya-Azərbaycan: dünən, bu gün, sabah” mövzusunda dəyirmi masa təşkil olunub, taleyi Rusiya ilə sıx bağlı olmuş Ulu Öndər Heydər Əliyevin həyat və fəaliyyəti haqqında filmin təqdimatı keçirilib.
Samara vilayətində 120-dən çox millətin nümayəndəsi yaşayır. Xalqların dostluğunun möhkəmlənməsində ictimai təşkilatlar və birliklər böyük rol oynayır. Azərbaycanlılar regionun ictimai həyatında fəal iştirak edir, onun mədəni ənənələrini zənginləşdirirlər. Belə ki, Azərbaycan Mədəniyyət Günlərinin Samarada əsas təşkilatçısı qismində çıxış edən “Samara Vilayətinin Azərbaycanlılar Liqası” İctimai Birliyi nəzdində “Xəyal” və “Alpan” peşəkar yaradıcılıq kollektivləri formalaşıb. Bu kollektivlər şəhərin və vilayətin mədəni tədbirlərində tez-tez iştirak edirlər.
Tədbirdə qonaq qismində Azərbaycandan və Samara ilə qonşu regionlardan olan təmsilçilər, İctimai Palatanın üzvləri, ictimai xadimlər, alimlər, yerli milli ictimai təşkilatların liderləri, Privoljye Federal Dairəsi regionlarının, Dağıstan Respublikası və Moskva şəhərinin Azərbaycan ictimai birliklərinin rəhbərləri iştirak ediblər.
Samara vilayətinin qubernatoru Dmitri Azarovun adından tədbir iştirakçılarını qubernatorun birinci müavini - Samara vilayəti hökumətinin sədrinin vəzifəsinin icra edən Natalya Katina salamlayıb.
“Bizim regionda yaşayan azərbaycanlılar öz əcdadlarının mənəvi ənənələrinə əsaslanaraq, çoxmillətli quberniyamızın digər xalqlarının nümayəndələri ilə bu günün ən mühüm məsələlərini birgə həll edirlər. Siz öz tarixi Vətəninizlə möhkəm əlaqəni qoruyub saxlayaraq, ölkələrimiz və xalqlarımız arasında dostluq münasibətlərinin inkişafı üçün çox iş görürsünüz. Siz digər milli ictimai təşkilatlarla birgə böyük maarifləndirici işlər aparırsınız. Əminəm ki, irəlidə Samara vilayəti ilə Azərbaycan arasında millətlərarası sülhün qorunub saxlanması, dostluq və tərəfdaşlıq münasibətlərinin möhkəmləndirilməsi naminə birgə səmərəli fəaliyyətimizin böyük perspektivləri var”, - deyə region rəhbərinin müraciətində bildirilir.
N.Katina “Samara Vilayətinin Azərbaycanlılar Liqası” İctimai Birliyinin sədri Şirvan Kərimova xalqlar arasında dostluq əlaqələrinin möhkəmlənməsinə verilən böyük töhfəyə görə minnətdarlığını bildirib. Samara şəhər dairəsinin başçısı Yelena Lapuşkina “Samara Vilayətinin Azərbaycanlılar Liqası” İctimai Birliyinin üzvlərinə təşəkkürnamələr təqdim edib.
Həmin gün qala-konsert təşkil olunub. Konsertin proqramına virtuoz skripkaçı, Azərbaycanın Əməkdar artisti Ceyhun İsmayılovun dirijor, Samara vilayətinin Əməkdar artisti Mark Koqanın rəhbərlik etdiyi Samara şəhər dairəsinin nəfəs alətləri orkestrinin birgə çıxışı, Rusiyanın Xalq artisti Mark Levyantın, kamançaçalan, Azərbaycanın Xalq artisti Elşən Mansurov və tarçalan İntiqam Oqtaylının müşayiəti ilə Xalq artisti Nəzakət Teymurovanın, Ümumrusiya və beynəlxalq müsabiqələr laureatı Vadim Zubkovun, “Samara Vilayətinin Azərbaycanlılar Liqası”nın “Xəyal” və “Alpan” rəqs kollektivlərinin, Ümumrusiya musiqi müsabiqələrinin laureatı Aida Əkbərovanın çıxışları daxil idi.
Tədbirin ikinci günü qonaqlar Samara vilayətinin Xalqlar dostluğu evində olublar. Müəssisənin direktoru İqor Burov təşkilatın tarixi və fəaliyyəti, milli mədəni mərkəzlər barədə, eləcə də vilayətdə keçirilən millətlərarası və milli tədbirlərdən söhbət açıb. Azərbaycan təmsilçiləri Xalqlar dostluğu evinin fəaliyyətinin mühümlüyünü dəyərləndirib, eləcə də “Samara Vilayətinin Azərbaycanlılar Liqası”na göstərilən dəstəyə görə minnətdarlıqlarını bildiriblər.