SAATLIDA DAŞQINDAN MÜHAFİZƏ TƏDBİRLƏRİ DAHA İNTENSİV XARAKTER ALMIŞDIR
Saatlı, 10 may (AZƏRTAC). Son günlər Araz çayında gursululuğun xeyli artması Saatlı rayonunda da gərgin vəziyyət yaranmasına səbəb olmuşdur. Sahilboyu ərazidə 6 ev uçmuş, 78 bina və 5 körpü qəzalı vəziyyətə düşmüş, 10 min 825 hektar əkin və örüş sahəsi su altında qalmış, 35 evin sakinləri evakuasiya edilmişdir.
Rayon Fövqəladə Hallar Komissiyasından aldığımız məlumata görə, ekoloji gərginliyin yaşandığı ərazilərə Fövqəladə Hallar Nazirliyi, “Meliorasiya və Su Təsərrüfatı” Açıq Səhmdar Cəmiyyəti və rayonun idarə müəssisə və təşkilatlarının 61 maşın-mexanizmi və iri texnikası, 4837 nəfər canlı qüvvəsi cəlb edilmişdir.
Daşqın yerlərində quraşdırılmış 54 su nasosu ilə qrunt suları çəkilərək kənara axıdılır.
Rayonda 20 kilometrə yaxın məsafədə bəndbərkitmə tədbirləri həyata keçirilmişdir.
İmişli, Saatlı və Sabirabad rayonlarının ərazisində yerləşən “Sarı su” gölündə su səviyyəsinin xeyli qalxması Saatlının bu sututara yaxın olan Məzrəli, Naharlı, Kamallı, Hacıqasımlı, Musalı, Nərimankənd və Dəlilər kəndlərində qrunt suyundan zərər çəkmiş həyətlərin sayının xeyli çoxalmasına gətirib çıxarmışdır.
Bölmənin digər xəbərləri
