Sankt-Peterburqda Xocalı faciəsinin 23-cü ildönümünə həsr olunmuş anım tədbiri keçirilib
Moskva, 26 fevral, AZƏRTAC
Sankt-Peterburqun mərkəzində yerləşən “Korintiya Nevski Palas” otelində Azərbaycanın Xocalı şəhərində baş vermiş faciəli hadisələrin 23-cü ildönümünə həsr edilmiş anım tədbiri keçirilib.
Azərbaycanın Sankt-Peterburqdakı baş konsulluğunun mətbuat xidmətindən AZƏRTAC-a verilən məlumata görə, anım tədbirinin təşkilatçıları qismində Azərbaycan Respublikasının Sankt-Peterburqdakı baş konsulluğu, “Naxçıvan” ictimai təşkilatı, Ümumrusiya Azərbaycanlılar Konqresinin Leninqrad vilayəti üzrə regional bölməsi və Rusiyanın Azərbaycanlı Gənclər Birliyinin regional bölməsi çıxış edib.
Tədbirdə baş konsulluğun diplomatları, Rusiya Yazıçılar İttifaqının üzvü, “Qarabağın qan çanağı” kitabının müəllifi, kulturologiya doktoru, professor Yuri Pompeyev, ictimai təşkilatların rəhbərləri, Türkiyənin Sankt-Peterburqdakı baş konsulluğunun əməkdaşları, Azərbaycan diasporunun fəal üzvləri, gənclər, tələbələr, Rusiya ictimaiyyətinin nümayəndələri və KİV təmsilçiləri iştirak ediblər.
Tədbirin əvvəlində 1992-ci il fevralın 26-da Azərbaycanın Xocalı şəhərində erməni təcavüzü və erməni hərbçilərinin vəhşilikləri nəticəsində həlak olanların xatirəsi bir dəqiqə sükutla yad edilib. Baş konsul Elşad Qulamov tədbiri açaraq 1992-ci ilin fevralında Ermənistan silahlı qüvvələri tərəfindən azərbaycanlılara qarşı törədilmiş soyqırımı barədə məlumat verilib. Diplomat qeyd edib ki, Xocalı faciəsi İkinci Dünya müharibəsindən sonra insanlığa qarşı törədilmiş ən dəhşətli cinayət olub.
Baş konsul İslam Əməkdaşlıq Təşkilatının Gənclər Forumunun mədəniyyətlərarası və sivilizasiyalararası dialoq məsələləri üzrə baş əlaqələndiricisi Leyla Əliyevanın təşəbbüsü ilə 2008-ci ildə başlanmış “Xocalıya ədalət!” beynəlxalq kampaniyası çərçivəsində görülmüş böyük işlər barədə də məlumat verib. O qeyd edib ki, məhz bu kampaniyanın gedişində həyata keçirilən geniş miqyaslı tədbirlər nəticəsində dünyanın müxtəlif ölkələrinin parlamentləri və beynəlxalq təşkilatlar azərbaycanlılara qarşı törədilmiş soyqırımını tanıyıblar.
Tədbir iştirakçıları “Xocalıya ədalət!” kampaniyasının saytında dünya parlamentarilərinə və beynəlxalq təşkilatlara ünvanlanmış petisiya üçün imza toplanması proseduru ilə tanış ediliblər.
Anım gecəsində professorlar Yuri Pompeyev və Niyazi Niyazov, azərbaycanlıların ictimai təşkilatlarının rəhbərləri İdris Qəhrəmanov, Mirtofiq Qasımov, Məzahir Həsənov, Rusiyanın Fəxri Hüquqşünası Yuri Sultanov, Sankt-Peterburq Milli Mədəniyyətlər Evinin diyarşünası Almira Tahircanova, Sankt-Peterburqda təhsil alan azərbaycanlı tələbələrin nümayəndəsi Güllüzar Qasımova çıxış ediblər. Onlar Xocalı soyqırımının Azərbaycan xalqının tarixində ən ağır, ən qanlı səhifə olduğunu vurğulayaraq qeyd ediblər ki, Xocalıda bizim xalqımıza qarşı törədilmiş vəhşiliklər heç vaxt unudulmayacaq və vaxt gələcək, bu cinayətin təqsirkarları beynəlxalq məhkəmə qarşısında cavab verməli olacaqlar. Natiqlər Azərbaycan ərazilərinin işğal edilməsi məsələsinin müzakirə olunması üçün rusiyalı və azərbaycanlı politoloqların, tarixçilərin, beynəlxalq hüquq və beynəlxalq münasibətlər üzrə ekspertlərin iştirakı ilə “dəyirmi masa” keçirilməsini təklif ediblər.
Sonra tədbir iştirakçıları Xocalı faciəsinə həsr olunmuş “Məhv edilmiş şəhər” adlı sənədli filmə baxıblar. Tədbirin sonunda Müqəddəs Qurandan surələr oxunub.
“Korintiya” otelinin hollunda qanlı Xocalı faciəsini əks etdirən fotomateriallar, bu hadisələrə həsr olunmuş kitablar, kitabçalar və jurnallar sərgilənib. Tədbirin rəsmi hissəsi başa çatandan sonra ehsan süfrəsi açılıb.
Fəridə Abdullayeva
AZƏRTAC-ın xüsusi müxbiri
Sankt-Peterburq
Bölmənin digər xəbərləri
