SANLAB-ın qurucusu: Azərbaycanda 10-dan çox məkanda fəaliyyət göstəririk MÜSAHİBƏ
Bakı, 23 dekabr, Leyla Muradzadə, AZƏRTAC
Silikon Vadisinə Türkiyə tərəfindən göndərilən ilk texnologiya şirkəti – SANLAB-ın qurucusu Salih Kükrek, təhsil simulyatorları və real zamanlı robototexnika sahəsində Türkiyənin ehtiyacı olan texnologiyaları milliləşdirmək məqsədilə texnologiya sahibkarlığına addım atmışdır. Şirkət təkcə öz ölkəsində deyil, Azərbaycan da daxil olmaqla, dünyanın bir çox bölgəsində fəaliyyət göstərir. AZƏRTAC-ın müxbiri ilə həmsöhbət olan Salih Kükrek SANLAB-ın ümumi iş prinsipləri və Azərbaycan bazarındakı fəaliyyət perspektivləri barədə danışıb.
-SANLAB şirkətinin fəaliyyəti haqqında danışardınız.
-Yarandığı gündən etibarən SANLAB öz sahəsində təkcə Türkiyədə deyil, dünyada sayılıb-seçilən texnoloji şirkətlərdən biridir. Biz bir tərəfdən müdafiə və avtomobil sənayesi üçün robot sistemləri, digər tərəfdən peşə təhsili üçün simulyasiya texnologiyaları inkişaf etdiririk.
SANLAB yalnız bir avadanlıq istehsalçısı deyil, həm də performansyönümlü modelləşdirmə proqram təminatı hazırlayan, sənaye və təhsil üçün ixtisaslı işçi qüvvəsi yetişdirən bir texnologiya bazasıdır. Təhsil texnologiyalarımız sayəsində bu gün 40-dan çox peşə üzrə ixtisaslı kadrların hazırlanmasına töhfə veririk. İnkişaf etdirdiyimiz VR əsaslı öyrənmə və modelləşdirmə həlləri kimyadan logistikaya, məişət texnologiyalarından kənd təsərrüfatına qədər bir çox sektorda fəal şəkildə istifadə olunur və müxtəlif sahələrin ehtiyaclarına çevik şəkildə uyğunlaşır.
Gələcəyin peşələrindən tutmuş hər dövrün əvəzolunmaz fəaliyyət istiqamətlərinə qədər geniş perspektivli həllər təqdim edirik. Elektrikli avtomobillər kimi sürətlə inkişaf edən sektorlar üçün texniki xidmət və təlim dəstəyi təmin edir, namizədlərin qısa müddətdə peşəkarlaşmasına şərait yaradırıq. Tikinti texnikası, CNC, qaynaq, forklift və montaj kimi əsas sənaye peşələri üçün həllərimiz sayəsində insanları maksimum üç ay ərzində işə hazır, bacarıqlı və yüksəkixtisaslı işçi qüvvəsi kimi sahəyə cəlb edirik.
Simulyatorlarımız 56 il ərzində Türkiyənin 300-dən çox nöqtəsində, eləcə də dünyanın müxtəlif ölkələrində, xüsusi ilə də Azərbaycanda 10-dan çox məkanda fəaliyyət göstərir. Bu günə qədər on minlərlə insan bizim simulyatorlarımızda təlim keçərək peşəyə yiyələnib və ixtisaslı məşğulluq sisteminə daxil olub.
-SANLAB-ın qlobal rəqiblər üzərində əsas texnoloji üstünlüyü nədir?
-SANLAB-ın qlobal rəqibləri qarşısındakı ən mühüm texnoloji üstünlüyü modelləşdirmə qərarlarında əldə etdiyi gerçəkliyin yüksək qavranılması və öz riyazi gücüdür. Qlobal miqyasda fəaliyyət göstərən bir çox şirkət standart və ümumiləşdirilmiş həllər təklif etsə də, SANLAB simulyatorlarında istifadə olunan fizika mühərriklərini və 6 oxlu hərəkət sistemlərini avtomobilin real dinamikasını dəqiq əks etdirmək üçün öz mühəndislik infrastrukturu ilə inkişaf etdirir.
Bununla yanaşı, müştəri ehtiyaclarına uyğun hazırlanan xüsusi layihələr üçün proqram və aparat həllərindəki çevikliyimiz SANLAB-ı qlobal rəqiblərdən fərqləndirən əsas elementlərdən biridir.
-Siz artıq Azərbaycan bazarına daxil olmusunuz. Bilmək istərdik ki, işğaldan azad olunmuş torpaqlarda hər hansı fəaliyyət barədə düşünürsünüz?
-Bu yaxınlarda buldozer və ekskavator simulyatorlarımızla Azərbaycan bazarına daxil olduq. Biz texnologiyamızı “iki dövlət, bir millət” fəlsəfəsinin gətirdiyi həssaslıqla Azərbaycan xalqının xidmətinə təqdim etmişik. Bizim üçün bu, təkcə kommersiya fəaliyyəti deyil, həm də regionun inkişafı prosesinə verdiyimiz dəyərli töhfədir.
Xüsusilə işğaldan azad edilmiş ərazilərin yenidən qurulması irimiqyaslı və çoxşaxəli bir prosesdir. Bu prosesin sürətinə birbaşa təsir edən amillərdən biri də ixtisaslı texnika operatorlarına olan ehtiyacdır. Digər tərəfdən, biz iki vətəni birləşdirən Naxçıvana da xüsusi əhəmiyyət veririk. SANLAB olaraq, ixrac etdiyimiz simulyatorların köməyi ilə həm Bakıda, həm də Naxçıvanda gəncləri sıfır risk və aşağı xərclə qısa müddət ərzində peşəkar operatorlar kimi yetişdirməyə çalışırıq. Bu yanaşma Azərbaycana ehtiyac duyduğu insan resurslarını çevik və dinamik şəkildə artırmağa imkan verir.
Vizyonumuz yalnız təhsillə məhdudlaşmır; yenidənqurma prosesinin rəqəmsal transformasiyasında da fəal iştirak etməyə hazırıq. İnkişaf etdirdiyimiz IoT əsaslı “ConnTrack” telemetriya həlli ilə tikinti meydançalarında texnikaların səmərəliliyini, yanacaq sərfiyyatını və performansını anlıq izləyə və optimallaşdıra bilərik. Bundan əlavə, mina riski olan və ya çətin relyefli ərazilərdə istifadə üçün hazırladığımız dəstlərlə mövcud iş maşınlarını uzaqdan idarə oluna bilən hala gətiririk. Beləliklə, operatorların həyatını riskə atmadan, kilometrlərlə uzaqdan təhlükəsiz tikinti və təmizləmə işlərini təmin edirik.
SANLAB olaraq, biz təkcə simulyatorlarla deyil, həm də qabaqcıl texnoloji həllərimiz və hazırladığımız ixtisaslı kadrlarla Azərbaycanın yenidənqurma prosesini dəstəkləməyə davam edəcəyik.
Bölmənin digər xəbərləri
