Səfir: Azərbaycan “Davamlı inkişaf naminə su” Beynəlxalq Onilliyinin məqsədlərinə nail olunmasına töhfə verir
Bakı, 6 may, AZƏRTAC
Bakı ilə Düşənbə arasında əməkdaşlığın gücləndirilməsi çərçivəsində qlobal su gündəliyinin həyata keçirilməsində Azərbaycanın fəal roluna xüsusi diqqət yetirilir.
AZƏRTAC xəbər verir ki, bu barədə mayın 6-da keçirilən brifinqdə Tacikistanın Azərbaycandakı səfiri İlhom Abdurahmon bildirib.
Səfir qeyd edib ki, Azərbaycan Tacikistanın su təşəbbüslərini beynəlxalq səviyyədə davamlı olaraq dəstəkləməklə yanaşı, həm də “Davamlı inkişaf naminə su” Beynəlxalq Fəaliyyət Onilliyinin məqsədlərinə çatmaq üçün əməli töhfələr verir.
Azərbaycan üçün Düşənbə Su Prosesində iştirak, xüsusən də azad edilmiş ərazilərdə ekosistemin bərpası kontekstində xüsusi əhəmiyyət kəsb edir.
“Hazırda Qarabağ və Şərqi Zəngəzur iqtisadi rayonlarında su infrastrukturunun modernləşdirilməsi və rasional su idarəetmə sistemlərinin tətbiqi üzrə genişmiqyaslı layihələr həyata keçirilir ki, bu da qarşıdan gələn 4-cü Düşənbə Konfransının prioritetləri ilə birbaşa uzlaşır. COP29-a sədrliyi dövründə Bakının su məsələlərinin iqlim gündəliyinə inteqrasiyası sahəsində topladığı təcrübə beynəlxalq ekspertlər tərəfindən 2026-cı ilin dekabr ayında Əbu-Dabidə keçiriləcək BMT Qlobal Konfransına hazırlıq işlərinə dəyərli töhfə kimi qiymətləndirilir.
İki ölkənin su sektorunda əməkdaşlığı elmi və texniki mübadilə üçün də yeni perspektivlər açır. Azərbaycan su idarəetmə sistemini rəqəmsallaşdırmaq üçün Tacikistanda yaradılmış Beynəlxalq Məsləhət Komitəsinin təcrübəsindən istifadə etməkdə maraqlı olduğunu bildirir. Bakı və Düşənbənin səyləri arasındakı sinerjinin buzlaqların qorunması və transsərhəd resursların idarə olunması üçün birgə regional mexanizmlərin hazırlanmasına gətirib çıxaracağı gözlənilir ki, bu da onilliklər ərzində bütün Cənubi Qafqaz və Mərkəzi Asiya regionunda ətraf mühitin davamlılığının təmin edilməsində mühüm element olacaq”, - deyə diplomat bildirib.
Bölmənin digər xəbərləri
