“Səfirin su mütəxəssisləri proqramı”na start verilib
Bakı, 14 oktyabr, AZƏRTAC
ABŞ-ın Təbii Sərvətlər və Ətraf Mühitin Qorunması Departamenti bu ölkənin Azərbaycandakı səfirliyi ilə birgə ölkəmizdə “Səfirin su mütəxəssisləri proqramı” çərçivəsində sessiyalar keçirir. Proqramın nəzərdə tutulan dörd sessiyanın birincisi artıq reallaşdırılıb.
Səfirliyin mətbuat xidmətindən AZƏRTAC-a bildirilib ki, ölkəmizin dövlət qurumlarının ekspertlərinin də iştirakı ilə keçirilən virtual tədbirlər silsiləsi suyun keyfiyyəti, su təchizatının proqnozlaşdırılması, çay axınının proqnozlaşdırılması və suyun mühafizəsi ilə bağlı spesifik məsələləri əhatə edib. Birinci sessiya ABŞ Meliorasiya Bürosunun ekspertləri Avra Morqan, Kevin Tilen və Marketa MakQayr tərəfindən aparılıb və əsas diqqət şirin su ehtiyatlarının və su idarəetmə imkanlarının idarə edilməsi və mühafizəsinin təşviqinə yönəlib.
Birləşmiş Ştatlar dayanıqlı su idarəetməsi haqqında məlumatı bölüşmək üçün Azərbaycandakı tərəfdaşları ilə birgə işləyir. “Səfirin su mütəxəssisləri proqramı” ABŞ Prezidentinin qlobal su strategiyasının tərkib hissəsidir və su təhlükəsizliyi üçün texniki yardım göstərir, dayanıqlı infrastruktur və xidmətləri təşviq edir, elm, texnologiya və informasiyanı təşviq edir.
“Dayanıqlı su idarəçiliyi təhsil, innovasiya və daha geniş beynəlxalq əməkdaşlıq vasitəsilə təkmilləşdirilə bilən həll yolları olan ortaq problemdir. “Səfirin su mütəxəssisləri proqramı” bu ehtiyacı ödəmək üçün ilk, lakin mühüm bir addımdır”, - deyə ABŞ-ın Azərbaycandakı müvəqqəti işlər vəkili Hüqo Guevara bildirib.
Qeyd edək ki, hər il 3,4 milyon insan su ilə yoluxan xəstəliklərdən həyatını itirir. Ümumdünya Səhiyyə Təşkilatının məlumatına görə, təxminən 2,2 milyard insanın, yəni dünya əhalisinin təxminən üçdə birinin təhlükəsiz içməli suya çıxışı yoxdur.
Meliorasiya Bürosunun missiyası Amerika ictimaiyyətinin maraqlarına uyğun olaraq su və əlaqədar ehtiyatları ekoloji və iqtisadi cəhətdən əsaslandırılmış şəkildə idarə etmək, inkişaf etdirmək və qorumaqdır. 1902-ci ildə yaradılmış Meliorasiya Bürosu 17 qərb əyalətində inşa etdiyi bəndlər, elektrik stansiyaları və kanalları ilə yaxşı tanınır. O, ölkənin ən böyük topdan su tədarükçüsüdür, ümumi saxlama qabiliyyəti 140 milyon akr-fut (172.6872 milyard kub metr) olan 338 su anbarını idarə edir (bir akr-fut, 325,851 qallon su (1481 kub metr su), dörd nəfərlik bir ailəni bir il ərzində kifayət qədər su ilə təmin edir).
Bölmənin digər xəbərləri
