Şəhidlərin xatirəsi əbədiyaşardır
Bakı, 26 fevral, AZƏRTAC
Bu gün Xocalı soyqırımından 27 il ötür. Lakin Xocalı qırğını qan yaddaşımızdan heç zaman silinməyəcək. Ermənilər Xocalıda insanlığa qarşı ən dəhşətli cinayətlər törədib, günahsız, dinc insanların qanlarını axıdıblar.
Xocalıda düşmənə qarşı son nəfəsinədək döyüşən Azərbaycanın Milli Qəhrəmanı Tofiq Hüseynov tələbə yoldaşım idi. Çox mərd, vətənpərvər insan idi. Onun məzarı Şəhidlər xiyabanındadır. Şəhidlərin əziz xatirəsi daim qəlbimizdə yaşayacaq.
Bu sözləri xalqımızın azadlığı, ölkəmizin ərazi bütövlüyü uğrunda canlarından keçmiş Vətən övladlarının xatirəsini yad etmək üçün Şəhidlər xiyabanına gələn, Ağdamdan olan köçkün Əbülfət Nəsibov AZƏRTAC-a müsahibəsində deyib. O bildirib ki, məkrli ermənilərin şəhər və kəndlərimizdə axıtdıqları qanlar yerdə qalmayacaq, biz işğal altındakı torpaqlarımızı tezliklə azad edəcəyik.
Azərbaycanın sürətlə inkişafını vurğulayan Əbülfət Nəsibov xalqımızın daha parlaq sabahına inamını ifadə edib.
Bölmənin digər xəbərləri
