ŞƏKƏR ZAVODU TİKMƏK NƏZƏRDƏ TUTULUR
“Azərsun” holdinqin rəhbərliyi yaxın günlərdə Azərbaycanda şəkər zavodunun tikilməsi məsələləri barədə Almaniya şirkətləri ilə danışıqlar aparacaqdır. Bu şirkətlərlə bir qədər əvvəl aparılmış danışıqlar zamanı əldə olunmuş razılaşmalara əsasən, tikintinin smeta dəyəri təxminən 60 milyon dollar təşkil edəcəkdir. Holdinqdən AZƏRTAC-a bildirmişlər ki, zavod üç ilə yaxın müddətdə tikiləcəkdir. Layihəyə sərmayənin çox hissəsini “Azərsun” qoyacaqdır.
İlkin proqnozlara görə, müəssisə yerli əhalinin tələbatını ödəmək üçün 350 min tona yaxın şəkər və şəkər tozu istehsal etməlidir. Xammal isə Braziliyadan gətiriləcəkdir.
Zavodu İmişli rayonunda tikmək qərara alınmışdır. Belə ki, burada və ətraf bölgələrdə şəkər çuğunduru istehsal edər fermer təsərrüfatları var.
Kənd Təsərrüfatı Nazirliyindən alınan məlumata görə, hazırda Azərbaycanda şəkər çuğunduru çox az becərilir. Halbuki ötən illərdə xeyli çox idi. Lakin emal zavodu olmadığından yerli fermerlər öz məhsullarını qonşu ölkələrə satmağa məcbur olurdular. “Azərsun” zavodun tikintisindən əlavə, ölkəmizdə şəkər çuğunduru istehsalının genişləndirilməsinə 10 min dollar sərmayə qoymaq niyyətindədir.
Bölmənin digər xəbərləri
