Şəkidə yeraltı təkanlar nəticəsində dağıntı qeydə alınmamışdır
Şəki, 27 iyun (AZƏRTAC). İyunun 26-da yerli vaxtla saat 01.05 və 23.25-də baş vermiş 4,5 və 3,0 bal gücündə yeraltı təkanlar nəticəsində Şəkidə fərdi evlərə və ictimai binalara heç bir ziyan dəyməmişdir.
Rayon fövqəladə hallar komissiyası sədrinin müavini Valeh Ələkbərov AZƏRTAC-a bildirmişdir ki, təkrar yeraltı təkanlar zamanı əvvəlki zəlzələlərdə qəzalı vəziyyətə düşmüş bəzi evlərin divarlarındakı çatlar nisbətən genişlənmişdir. Əhali arasında tələfat halları qeydə alınmamışdır.
Ümumiyyətlə, zəlzələlərin davam etdiyi 2 aya yaxın müddətdə rayon fövqəladə hallar komissiyasına əhali tərəfindən 300-ə yaxın müraciət daxil olmuşdur. Komissiyaların apardıqları təhlillərə görə, yeraltı təkanlar nəticəsində tam qəzalı vəziyyətə düşən, uçan evlər qeydə alınmamış, bəzi evlərin divarlarında çatların əmələ gəldiyi müəyyən olunmuşdur. Əvvəlki zəlzələlər zamanı qəzalı vəziyyətə düşmüş şəhərdəki 12, 14 və 17 nömrəli tam orta məktəblər üçün isə tezliklə yeni binaların tikintisinə başlanılacaqdır.
Bölmənin digər xəbərləri
