Səkkiz il ərzində Türkiyə Silahlı Qüvvələri sıralarından 23 mindən artıq hərbçi xaric edilib
İstanbul, 15 iyul, Günel Karatepe, AZƏRTAC
Türkiyədə 2016-cı il iyulun 15-də baş verən dövlət çevrilişinə cəhddən sonra ölkənin təhlükəsizlik strukturlarına sızan FETÖ terror təşkilatının üzvlərinə qarşı genişmiqyaslı əməliyyatlar keçirilib. Ötən səkkiz il ərzində Türkiyə Silahlı Qüvvələri sıralarından terror təşkilatı ilə əlaqəsi olmaqda şübhəli bilinən 23859 hərbçi xaric edilib, 2292 nəfərin rütbəsi alınıb. Vəzifədən kənarlaşdırılan və ya vəzifəsinin icrası müvəqqəti dayandırılan şəxsi heyətin sayı isə 245 nəfərdir.
AZƏRTAC xəbər verir ki, ötən ilin iyulun 1-dən bu il iyulun 12-dək 486 terror təşkilatı üzvü Türkiyənin sərhəd mühafizə qüvvələri tərəfindən saxlanılaraq hüquq-mühafizə orqanlarına təhvil verilib. Onlardan 334-nün FETÖ, 125-nin PKK, 21-nin İŞİD və 6-nın MLKP-DHKP/C terror təşkilatına üzv olduğu müəyyən olunub.
Ötən dövr ərzində hadisə ilə bağlı ölkə üzrə məhkəmələrə 293 müraciət daxil olub. Hücum zamanı həyatını itirənlər və yaralananlar adına açılan 289 məhkəmə işində ümumilikdə 8725 nəfər barəsində qərar verilib. Onlardan 4891 nəfər həbs cəzasına məhkum edilib. Dövlət çevrilişinə cəhdə görə mühakimə olunan və ağırlaşdırılmış ömürlük həbs cəzasına məhkum edilən 1634 müttəhimdən 85-i general və admiral, 1116-sı zabit, 9-u polisdir. Eyni ittihamla ömürlük azadlıqdan məhrum edilən 1366 müttəhimdən 24-ü general və admiraldır. Türkiyənin 58 vilayətində görülən bu məhkəmə proseslərində 2870 nəfər barəsində bəraət hökmü çıxarılıb.
Bölmənin digər xəbərləri
