SƏRHƏDÇİLƏR QAÇAQMALÇILIQLA MÜBARİZƏNİ GÜCLƏNDİRİRLƏR
Son bir ay ərzində Azərbaycandan Gürcüstana 6345 litr dizel yanacağı, 1100 litr mühərrik yağı, 3095 kiloqram əlvan metal, 44 kiloqram qara kürü, 50 kiloqram nərə balığının qeyri-qanuni aparılmasının qarşısı alınmışdır. Eyni zamanda, Gürcüstandan respublikamıza qanunsuz yolla müxtəlif gümüş zinət əşyalarının, otbiçən kombaynın, 3 min ədəd “Qlyuferal” adlı dərman preparatının, 140 litr spirtin, 100 qutu siqaretin, 100 başadək mal-qaranın keçirilməsinin qarşısı alınmışdır.
Sərhədçilərimiz Rusiyadan Azərbaycana 22 min qutu müxtəlif markalı siqaret, 187 ədəd alkoqol məhsulu və 72,3 kiloqram qara kürünün qanunsuz keçirilməsinə yol verməmişlər. İranla dövlət sərhədində Azərbaycandan İrana 2370 ABŞ dolları, 104 ədəd müxtəlif markalı alkoqol məhsullarının, 160 dəst qadın kostyumunun və 4 baş mal-qaranın, İrandan Azərbaycana isə 902 ədəd kompüterin, 47 ədəd zinət əşyasının və 983 min İran rialının qeyri-qanuni keçirilməsinin qarşısı alınmışdır.
Son dövrdə sərhədçilərimiz tərəfindən 91 nəfər sərhəd pozucusu, 141 nəfər sərhəd rejim pozucusu saxlanılmış, axtarışda olan 41 nəfər şəxs müəyyənləşdirilərək yaxalanmışdır.
Bundan əlavə, sərhədçilərimizin sayıqlığı nəticəsində saxta və başqasına məxsus sənədlərlə dövlət sərhədini keçməyə cəhd göstərən 45 nəfər, o cümlədən 10 nəfər Azərbaycan, 10 nəfər Rusiya, 2 nəfər Gürcüstan, 3 nəfər Türkiyə, 2 nəfər İran, 1 nəfər Əfqanıstan, 8 nəfər Çin və 9 nəfər Sinqapur vətəndaşı saxlanılmışdır. Əməliyyat tədbirləri nəticəsində Qazax rayonu ərazisində gizli yolla Azərbaycandan Gürcüstana keçməyə cəhd göstərən sərhəd pozucularına bələdçilik edən qrupun üzvləri aşkar edilərək saxlanılmışlar.
