Siyasi ekspert: Azərbaycan-İtaliya münasibətləri müttəfiqlik xarakteri daşıyır
Bakı, 13 fevral, AZƏRTAC
Azərbaycan-İtaliya münasibətləri möhkəm təməllər üzərində qurulmuş qarşılıqlı faydalı əməkdaşlığa söykənir. Hər iki ölkənin strateji tərəfdaşlıq münasibətlərinin genişləndirilməsi istiqamətində nümayiş etdirdiyi səylər dövlətlərarası əlaqələrin bütün istiqamətlərində öz bəhrəsini verməkdədir.
Bu fikirləri AZƏRTAC-a açıqlamasında siyasi ekspert Elçin Mirzəbəyli deyib.
Siyasi ekspert bildirib ki, İtaliya istər torpaqlarımızın işğal altında olduğu vaxtda, istər 44 günlük Vətən müharibəsi, istərsə də postmüharibə dövründə ölkəmizə qarşı ədalətli mövqe sərgiləyən, dövlətlərarası münasibətlərdə ərazi bütövlüyü, sərhədlərin toxunulmazlığı və suverenlik kimi beynəlxalq hüququn fundamental norma və prinsiplərini əsas götürən, bu xüsusda manipulyasiyaya yol verməyən bir ölkə olaraq Azərbaycanın xarici siyasətində önəmli yerlərdən birini tutur.
İtaliya parlamentarilərinin 44 günlük müharibədən qısa müddət sonra Azərbaycanın işğaldan azad edilmiş ərazilərinə səfər etmələri, İtaliya mediasının müharibə və onun nəticələri, eləcə də Ermənistanın Azərbaycanın mülki əhalisinə qarşı törətdiyi müharibə cinayətləri, vandalizm aktları barədə obyektiv və ədalətli mövqe sərgiləməsi iki ölkə arasındakı bağların möhkəmliyindən, qarşılıqlı əlaqələrin intensivliyi və dayanıqlılığından, kənar təsirlərə məruz qalmadığından xəbər verir.
E.Mirzəbəylinin sözlərinə görə, hər iki ölkənin Cənub Qaz Dəhlizi layihəsinin gerçəkləşməsi istiqamətində atdığı addımların Avropanın enerji təhlükəsizliyində oynadığı rol bu gün dünyada baş verən geosiyasi proseslər fonunda daha aydın görünür.
Son bir ay ərzində İtaliya hökumətinin üç nazirinin Azərbaycana səfər etməsi ölkələrimiz arasında əlaqələrin nə qədər dinamik olduğunu göstərir. Təsadüfi deyil ki, bu əlaqələr neft, qaz, yaşıl enerji sektorlarından başlayaraq, təhsil, tikinti və digər istiqamətləri əhatə edir. Zaman keçdikcə bu əməkdaşlıq sahələrinin dairəsi daha da genişlənir, Azərbaycan və İtaliya ilə yanaşı, hər iki ölkəyə qonşu dövlətlərin iqtisadiyyatına, enerji təhlükəsizliyinə də öz müsbət təsirini göstərir.
"Bu münasibətlər Azərbaycan-İtaliya əməkdaşlığının strateji tərəfdaşlıq müstəvisindən də yüksək olduğunu, mahiyyətcə müttəfiqlik xarakteri daşıdığını bir daha sübuta yetirir", - deyə Elçin Mirzəbəyli vurğulayıb.
Bölmənin digər xəbərləri
