SON MƏNZİLƏ
Mərhumun cənazəsi Musiqili Komediya Teatrının matəmsayağı bəzədilmiş səhnəsində postament üzərinə qoyulmuşdu. Postamentin ətrafına Azərbaycan Prezidenti İlham Əliyevin adından, habelə Heydər Əliyev Fondu, Azərbaycan Mədəniyyətinin Dostları Fondu, dövlət və hökumət təşkilatları, teatr kollektivləri adından əklillər düzülmüşdü.
Salonda həzin matəm musiqisi səslənirdi.
Görkəmli səhnə ustası Hacıbaba Bagırovun həmkarları, dostları, tanınmış mədəniyyət, incəsənət və elm xadimləri, deputatlar, mərhumun sənətinin pərəstişkarları teatrın binasına gələrək, unudulmaz sənətkara son borclarını verir, mərhumun cənazəsi yanında fəxri qarovulda dayanırdılar.
Matəm mitinqini mədəniyyət və turizm naziri Əbülfəs Qarayev açaraq, Hacıbaba Bağırovun həyat və yaradıcılığından, ölkəmizdə teatr və kinonun inkişafında xidmətlərindən, yaratdığı parlaq və dolğun obrazlarla teatr sənətimizi zənginləşdirməsindən danışdı. Bildirdi ki, yaradıcılıq fəaliyyətinə 1950-ci ildən Lənkəran Dövlət Dram Teatrında başlamış, 1960-cı ildən Gəncə Dövlət Dram Teatrında çalışan aktyor 1962-ci ildən Azərbaycan Dövlət Musiqili Komediya Teatrında işləmişdir. 1989-1996-cı illərdə özünün təşkil etdiyi Bakı Tənqid-Təbliğ Teatrının bədii rəhbəri işləmiş, 1996-cı ildən yenidən Musiqili Komediya Teatrına qayıtmış, onun bədii rəhbəri və direktoru olmuşdur. Onun milli mentalitetə uyğun yaratdığı, özünəməxsus yumorla yoğrulmuş rolları musiqili komediya teatrımızın tarixinə həmişəlik daxil olmuşdur.
Teatr Xadimləri İttifaqının sədri, xalq artisti Azər Paşa Neymətov, xalq artistləri Səyavuş Aslan, Afaq Bəşirqızı, Cənnət Səlimova, xalq artisi, C.Cabbarlı adına “Azərbaycanfilm” Kinostudiyasının direktoru Xamis Muradov səhnəmizdə zəngin obrazlar yaradan sənətkara Allah-taaladan rəhmət diləyərək, onun yaradıcılığının xarakterik xüsusiyyətlərindən danışdılar. Bildirdilər ki, Hacıbaba Bağırov Azərbaycan milli teatr sənətimizin zəngin ənənələrini layiqincə davam etdirərək, 50 ildən artıq səhnə fəaliyyəti dövründə yaratdığı parlaq obrazlarla tamaşaçıların dərin rəğbətini qazanmışdır.
Onun canlandırdığı obrazlar yüksək dərəcədə təbiiliyi, milliliyi və müasirliyi ilə səciyyələnirdi. Milli teatr tariximizin yetirdiyi böyük sənətkarlar nəslinin yaradıcılıq ənənələrinə sadiq qalan aktyor yüksək peşəkarlığı, qəhrəmanlarının mənəvi aləminə dərindən nüfuz etmək və zamanın ruhunu gözəl əks etdirmək bacarığı ilə seçilirdi. Onun böyük istedadla yaratdığı obrazlar özünün danışıq və davranış tərzləri ilə yadda qalmışdır.
Hacıbaba Bağırov kino aktyoru kimi də fəaliyyət göstərmişdir. Bədii filmlərdə yaratdığı maraqlı və yaddaqalan surətlər onun aktyor həyatının bir hissəsini təşkil edərək, fitri istedadını, sənətkarlıq bacarığını bariz şəkildə göstərmişdir.
Var qüvvəsini milli teatr və kino sənətimizin tərəqqisinə sərf etmiş aktyorun xidmətləri yüksək qiymətləndirilmişdir. O, müxtəlif fəxri adlara və mükafatlara layiq görülmüş, müstəqil Azərbaycanın “Şöhrət” ordeni ilə təltif edilmişdir.
Mərhumun həyat yoldaşı Arzu xanım matəm mərasimində çıxış edərək, ümummilli liderimiz Heydər Əliyevin və Azərbaycan Prezidenti İlham Əliyevin teatr və kino sənətinin inkişafında Hacıbaba Bağırovun xidmətlərinə verdikləri yüksək qiyməti, ona göstərdikləri diqqət və qayğını xüsusi vurğuladı və bütün bunlara görə dərin minnətdarlığını bildirdi. O, aktyorun sənətinin pərəstişkarlarına və matəm mərasiminin iştirakçılarına da təşəkkür etdi.
Mərasimdə Prezidentin İcra Aparatının Humanitar siyasət məsələləri şöbəsinin müdiri Fatma Abdullazadə iştirak edirdi.
X X X
Xalq artisti Hacıbaba Bağırovun cənazəsi teatrın binasından qaldırılaraq ikinci Fəxri xiyabana gətirildi. Burada mərhumun ruhuna dua oxundu. Əziz xatirəsi xalqımızın qəlbində yaşayacaq böyük sənətkar, qayğıkeş və səmimi insan Hacıbaba Ağarza oğlu Bağırovun cənazəsi doğma torpağa tapşırıldı. Məzarın üzərinə əklillər, gül dəstələri düzüldü.
Allah rəhmət eləsin, qəbri nurla dolsun!
Bölmənin digər xəbərləri
