Stokholmda kaustik turşusundan istifadə etməklə soyğunçuluq hallarının sayı artmaqdadır
Stokholm, 16 iyul, Nərgiz Cəfərli, AZƏRTAC
Bu ilin may ayından etibarən Stokholm polisi cinayətkarların quldurluq məqsədilə kaustik turşusundan istifadə etməklə əksəriyyəti şəhərin mərkəzi hissəsində yerləşən evlərə girməklə bağlı 47 hal müəyyən edib.
AZƏRTAC xəbər verir ki, bu barədə Stokholmda Normalm bölgəsinin yerli polis rəisi vəzifəsini icra edən Osa Valgren bildirib.
“Yay mövsümündə bir çox insan tətilə gedir. Buna görə də soyğunçuluq halları artır”, - deyə o qeyd edib.
Osa Valgren soyğunçuluq üsulunu “səssiz” kimi təsvir edir. Kaustik turşusu kilidləmə mexanizminin əriməsinə səbəb olur. Milli Məhkəmə-Tibbi Mərkəzi və Məhkəmə-Tibbi polis ekspertizası istifadə edilən turşuların növlərini müəyyən etməyə çalışır.
“Biz Stokholm regionunda müxtəlif orqanlarla əməkdaşlıq edirik, eləcə də Avropada da oxşar halları araşdırırıq. Almaniya, Belçika, Fransa və Portuqaliya da eyni cür problemlərlə üzləşib”, - deyə Osa Valgren qeyd edib.
Mayın 20-də canilərin turşu üsulundan istifadə etdikləri ilk soyğunçuluğun üstü açılıb.
Hazırda heç bir şübhəli şəxs yoxdur. Polisin məlumatına görə, bu hadisələr soyğunçuluqla bağlıdır.
Bölmənin digər xəbərləri
