Stokholmun həssas bölgələrində məktəbli qızların müvəffəqiyyət dərəcəsi aşağı düşüb
Stokholm, 26 sentyabr, Nərgiz Cəfərli, AZƏRTAC
Stokholmun həssas bölgələrində yerləşən və bu yaz doqquzuncu sinfi bitirən qızlar əvvəlki illərlə müqayisədə təhsildə daha zəif nəticələr göstəriblər.
AZƏRTAC İsveç polisinin yaydığı məlumatlara istinadla xəbər verir ki, son vaxtlar qızların və qadınların cinayətkar dəstələrdə iştirakı faktlarının artması müşahidə olunur.
“Ölkə üzrə qızların cinayət mühitinə cəlb edilməsi faktları narahatlıq doğurur”, - deyə Stokholm bölgəsi məktəb şurasının üzvü Emiliya Byuggren bildirir.
Bombadan Müdafiə Milli Xidmətinin əməliyyat direktoru Yon Volander isə bildirib ki, dəstə liderləri ibtidai məktəb yaşlı qız və oğlanları istismar edərək onlardan əl qumbaralarının və digər partlayıcı vasitələrin gizlədilməsində və daşınmasında istifadə edirlər.
“Bir hadisə baş vermişdi - qızlar otağındakı şkaflarda altı əl qumbarası saxlanılırdı. Partlayış baş versəydi, nəticələr qaçılmaz ola bilərdi. Kriminal dairələrdə qızları “yaşıl qarı” adlandırırlar, çünki onların fikrincə, qızlar polisin gözündən kənarda qalırlar. Keçmişdə qızlar üzərilərində axtarış aparılmasından müəyyən dərəcədə kənarda qalıblar. İndi bütün növbətçi polislər qızları da yoxlayır”, - deyə Yon Volander qeyd edir.
Stokholm Təhsil Administrasiyasının məlumatına görə, pis nəticələrin müvəqqəti hal və ya mənfi tendensiyanın başlanğıcı olduğunu söyləmək hələ tezdir.
“Təhsil sistemində məqsədyönlü işlərin görülməsinə, daha yüksək müəllim sıxlığına, uyğunlaşdırılmış təlim mühiti və yüksəkixtisaslı müəllimlərin olmasına baxmayaraq, sosial-iqtisadi cəhətdən həssas bölgələrdən olan şagirdlər təhsildə yaxşı nəticəyə nail olmaqda çətinlik çəkirlər. Buna məktəblərdə artan seqreqasiya və yaşayış seqreqasiyası mane olur”, - deyən administrasiya dərin təhlil aparılacağını və təhsilin inkişafı istiqamətində işlərin davam etdiriləcəyini vurğulayıb.
Bölmənin digər xəbərləri
