STRASBURQDA AZƏRBAYCAN MƏDƏNİYYƏTİNƏ HƏSR OLUNMUŞ TƏDBİR KEÇİRİLMİŞDİR
Türk təhsili departamentinin müəllimi Stefan de Taria bir müddət əvvəl yaradılmış “Azərbaycan evi”nin məqsəd və məramları barədə məlumat vermiş, zəngin mədəniyyətimiz, incəsənətimiz, adət və ənənələrimizlə bağlı silsilə tədbirlər keçirəcəyini bildirmişdir.
Sonra Milli Məclisin deputatı Rafael Hüseynov çıxış edərək demişdir:
-Fransa dünya mədəniyyətinin mərkəzlərindən biridir. Onun bir guşəsi olan Strasburqda “Azərbaycan evi”nin yaranması çox sevindirici haldır. Bu ev Azərbaycan mədəniyyətini, bütövlükdə Azərbaycan xalqını fransızlara və Fransa vasitəsilə dünyaya təbliğ etmək istiqamətində böyük işlər görəcəkdir.
“Azərbaycan evi”nin Fransada yaranmasının uzun bir tarixi vardır. İlk “Azərbaycan evi”ni XX əsrin 20-ci illərində Ceyhun Hacıbəyli və Əlimərdan bəy Topçubaşov kimi şəxslər yaratmışlar.
Azərbaycan mədəniyyətinin Fransada tanınması isə daha əvvəlki dövrlərə təsadüf edir. XVI-XIX əsrlərdə Fransanın bir çox tanınmış alimləri, səyyahları, yazıçıları ölkəmizə səfər etmişlər və burada gördüklərini öz əsərlərində, xatirələrində əks etdirmişlər. Fransanın böyük yazıçısı Aleksandr Düma vaxtilə Azərbaycanda olmuş, “Qafqaza səyahət” kitabında ölkəmiz barədə çox məhəbbətlə yazmışdır.
Görkəmli Azərbaycan şairi və filosofu Bahar Şirvani öz əsərlərini türk, ərəb və fars dilləri ilə yanaşı, fransız dilində də yazmışdır. Vaxtilə Fransada təhsil almış İsmayıl bəy Qutqaşınlı fransız dilində gözəl hekayələr yazmışdır. Fransada Banu təxəllüsü ilə tanınmış Ümbülbanu Əsədullayeva isə bütün əsərlərini fransız dilində yaratmışdır. Bütün bunlar göstərir ki, fransız mədəniyyəti ilə Azərbaycan mədəniyyəti daim təmasda olmuşdur.
Siyasi elmlər doktoru Jil Rio azərbaycanlıların qədim və zəngin mədəniyyətə malik olduğunu vurğulamış, son zamanlar fransızların bu mədəniyyətə böyük maraq göstərdiyini, fransız qəzet və jurnallarında Azərbaycan mədəniyyəti ilə bağlı yazılara geniş yer verildiyini, hazırda Fransa ilə Azərbaycan arasında bir çox sahələrlə yanaşı, mədəni əlaqələrin də inkişaf etdiyini bildirmişdir.
Daha sonra tədbir iştirakçılarının Azərbaycan mədəniyyəti ilə bağlı suallarına ətraflı cavab verilmişdir.
Bölmənin digər xəbərləri
