SUALTI BORU KƏMƏRLƏRİNİN ÇƏKİLİŞİNƏ YAYDA BAŞLANACAQ
“Azəri” yatağının işlənilməsi üzrə vahid layihə çərçivəsində sualtı boru kəmərlərinin çəkilişinə bu ilin yayında başlanacaqdır. Bu məlumatı AZƏRTAC-ın müxbirinə sualtı boru xətləri üzrə layihənin direktoru Toni Boyl vermişdir.
Layihə direktorunun sözlərinə görə, neftin və qazın sahilə çatdırılması üçün 700 kilometrlik kəmər çəkiləcək və bu zaman 17 növ borudan istifadə olunacaqdır. Kəmərlə yanaşı, həm də 6 növdən ibarət 250 kilometrlik kabel xətti də çəkilməlidir.
Təxminən mart ayının axırlarında isə boruların betonlaşdırılmasına başlanacaqdır. Bu işi “Azpetrol” və UPES şirkətlərinin yaratdıqları Azərbaycan-Almaniya müştərək müəssisəsi öz öhdəsinə götürmüşdür. Tikintinin isə 2004-cü ilə qədər başa çatdırılması nəzərdə tutulmuşdur.
Tikintiyə hazırlıq işləri hələ ötən il görülmüşdür. İndi”İsrafil Hüseynov” borudüzən gəmisi modernləşdirilir, yeni kranlar və digər qaldırıcı mexanizmlər quraşdırılır. Bu, iri diametrli boruları suyun altına düzməyi asanlaşdırmaqla yanaşı, həm də prosesi sürətləndirməyə imkan verəcəkdir. Ən başlıcası isə, bu kranlar istənilən hava şəraitində işləyə biləcəkdir. Gəminin may ayında dənizə çıxacağı gözlənilir.
Bölmənin digər xəbərləri
