SUMQAYIT KİMYAÇILARI ÖZ NAİLİYYƏTLƏRİNİ HEYDƏR ƏLİYEVİN ADI İLƏ BAĞLAYIRLAR
Konfrans iştirakçıları Azərbaycan xalqının ümummilli lideri, böyük vətənpərvər Heydər Əliyevin nurlu xatirəsini birdəqiqəlik sükutla yad etdilər.
Şirkətin prezidenti, Milli Məclisin deputatı Fikrət Sadıqov konfransı açaraq, respublikanın kimya sənayesinin yaranmasında və inkişafında Heydər Əliyevin rolundan danışdı və bildirdi ki, ötən əsrin 70-80-ci illəri Sumqayıtda yeni kimya müəssisələrinin sürətlə tikilməsi, müasir sexlərin və istehsal xətlərinin istismara verilməsi, elmi-tədqiqat institutlarının yaradılması ilə əlamətdardır. O, ümummilli liderimizin misilsiz xidmətlərindən, SSRİ məkanında, sonra isə beynəlxalq aləmdə Azərbaycanın nüfuzunun artmasında onun rolundan söhbət açdı.
Konfransda çıxış edənlər xalqımızın böyük oğlu Heydər Əliyevin Azərbaycana rəhbərlik etdiyi 34 il ərzində qazanılmış uğurların və nailiyyətlərin, həm də Sumqayıtın kimya və neft kimyası kompleksinin inkişafı ilə bağlı olduğunu vurğuladılar. Natiqlər bu sahənin maddi-texniki bazasının təkmilləşdirilməsi istiqamətində ümummilli liderimizin apardığı genişmiqyaslı işin əhəmiyyətindən danışaraq, ölkəmizdə kimya sənayesinin fəaliyyətini təmin edən nadir kompleksin – Etilen-polietilen zavodundakı buxar generatoru qurğusunun yaradılmasında onun rolunu nəzərə çarpdırdı, Prezident Heydər Əliyevin 2003-cü il aprelin 3-də Sumqayıta tarixi səfərindən sonra şəhərdə baş vermiş müsbət dəyişiklikləri yüksək qiymətləndirdilər.
Şəhər icra hakimiyyətinin başçısı Vaqif Əliyev çıxışında bildirdi ki, görkəmli siyasi və dövlət xadimi Heydər Əliyev yorulmadan təkrar edirdi: “Mən fəxr edirəm ki, azərbaycanlıyam”. Həqiqətən də, onun bütün həyat və fəaliyyəti xalqına sonsuz xidmətin parlaq nümunəsidir. Azərbaycanla fəxr edən Heydər Əliyev öz xalqının iftixarı oldu.
Konfransda qeyd edildi ki, Sovet İttifaqının süqutunun yaxınlaşdığını heç kimin bilmədiyi illərdə Heydər Əliyev dühası müstəqil dövlətimizin əsasını, onun atributlarını yaratmışdı. Peşəkar milli kadrlar hazırlanması məqsədi ilə gənclər aktual ixtisaslar üzrə təhsil almaq üçün keçmiş SSRİ-nin müxtəlif ali məktəblərinə göndərilirdilər. O illərdə bir sıra elektrik stansiyaları tikilib istifadəyə verilmişdi. Sonralar bunlar ölkəmizin güclü energetika sisteminin əsasını təşkil etmişdir və hazırda Azərbaycana bir çox problemlərin həlli ilə yanaşı, müstəqil siyasət yeritməyə imkan verir. Həmin dövrdə qeyri-neft sektoru da sürətlə inkişaf edirdi ki, bu da respublika iqtisadiyyatının perspektivli inkişafının əsasını təmin edirdi.
V.Əliyev vurğuladı ki, dövlətimizin başçısı İlham Əliyevin Avropa Şurası Parlament Assambleyasının sonuncu iclasındakı nitqi ümid etməyə əsas verir ki, Heydər Əliyevin Azərbaycanda həyata keçirdiyi siyasi xətt etibarlı əllərdədir və uğurla davam etdiriləcəkdir.
Tədbir iştirakçılarına sumqayıtlı müəlliflərin Heydər Əliyevin xatirəsinə həsr olunmuş yeni nəşrləri təqdim olundu.
Bölmənin digər xəbərləri
