Sumqayıt-Yalama dəmir yolu xəttində yenidənqurma işlərinin 53 faizi yekunlaşıb
Bakı, 14 iyun, AZƏRTAC
“Şimal-Cənub” Beynəlxalq Nəqliyyat Dəhlizinin önəmli tərkib hissəsi olan Sumqayıt-Yalama dəmir yolu xəttində yenidənqurma işlərinin 53 faizi uğurla yekunlaşıb.
AZƏRTAC xəbər verir ki, bunu Azərbaycan Dəmir Yolları (ADY) mətbuat katibliyinin müdiri Sənubər Nəzərova jurnalistlərə açıqlamasında bildirib.
Qeyd edilib ki, Sumqayıt-Yalama dəmir yolu Azərbaycanın tranzit-logistika potensialının gücləndirilməsində önəmli rol oynayan “Şimal-Cənub” Beynəlxalq Nəqliyyat Dəhlizinin reallaşdırılması istiqamətində görülən tədbirlər çərçivəsində yenidən qurulur. Abşeron yarımadasını respublikanın şimal sərhədi ilə birləşdirən yolun ox üzrə uzunluğu 167,7 kilometr, açılmış uzunluğu 362,8 kilometr təşkil edir.
Onun sözlərinə görə, ikixətli Sumqayıt-Yalama dəmir yolunda yenidənqurma işləri daşımalarla bərabər aparılır. Yolun bir xətti yenidən qurularkən digərində qatarlar hərəkət edir.
S.Nəzərova əlavə edib ki, ümumilikdə yenidənqurma işlərinin 53 faizi artıq tamamlanıb. Bu günədək yolun 200 kilometrlik hissəsində yeni rels-şpal şəbəkəsi quraşdırılıb, 174 kilometr dəmir yolu ilkin hərəkətə açılıb, 95 körpü, 225 dairəvi suötürücü boru, 13 heyvan keçidi və 7 yerüstü piyada keçidi inşa edilib.
ADY rəsmisi əlavə edib ki, hazırda texnoloji ardıcıllığa uyğun olaraq tikinti-quraşdırma işləri davam etdirilir. Yol boyu 13 yerüstü piyada keçidinin və 32 eyni səviyyəli dəmir yolu keçidinin tikintisi planlaşdırılır. Əsas yaşayış mərkəzlərindəki stansiyalarda inşa ediləcək yerüstü piyada keçidləri fiziki məhdudiyyətli insanlar üçün nəzərdə tutulan liftlərlə təchiz olunur.
Bildirilib ki, Sumqayıt-Yalama dəmir yolu xəttinin yenidən qurulması yükdaşıma və sərnişindaşıma fəaliyyətlərində vaxta qənaət, nəqliyyat vasitələrinin və infrastrukturun istismarı xərclərinin azalmasına, təhlükəsizliyin artırılması kimi faydalar gətirəcək. Belə ki, dəmir yolu xəttinin bərpası zamanı uzun ölçülü relslərdən istifadə edilməsi keyfiyyətli və sürətli yükdaşımalarının həyata keçirilməsi, bu əməliyyatların etibarlı və təhlükəsiz şəkildə icrası Azərbaycanın nəqliyyat-tranzit potensialından daha geniş və səmərəli istifadəsi üçün şərait yaradacaq. Yenidənqurma işlərinin 2024-cü ilin sonuna başa çatdırılması planlaşdırılıb.
Qeyd edək ki, “Şimal-Cənub” Beynəlxalq Nəqliyyat Dəhlizi əsasən Hindistandan və İran Körfəzi regionundan, yüklərin Rusiya, Qərbi Avropa, Baltikyanı və Skandinaviya ölkələrinə çatdırılmasına hesablanıb. Şimal-Cənub Tranzit Dəhlizinin digər marşrutlarla müqayisədə əsas üstünlüyü tranzit məsafəsinin və vaxtının iki-üç dəfə az olmasıdır. Əgər dəniz yolu ilə daşıma İran körfəzi və Hind okeanı, Süveyş kanalı, Aralıq dənizi, Baltik dənizindən keçərək Helsinki şəhərinə 45-60 gün ərzində daşıma müddəti təşkil edirsə, Şimal-Cənub Tranzit Dəhlizi ilə bu müddət 20-25 gün təşkil edir.
Bölmənin digər xəbərləri
