Sumqayıt Şəhəri İcra Hakimiyyətinin ötən ildəki fəaliyyətinə yekun vurulmuşdur. 

İcra hakimiyyətinin başçısı Təvəkkül Məmmədov “2002-ci ildə Sumqayıtın sosial-iqtisadi inkişafının yekunları və 2003-cü ildə qarşıda duran vəzifələr haqqında” məruzəsində şəhərin bütün fəaliyyət sahələri və strukturlarının işini ətraflı araşdıraraq bildirdi ki, sənayenin, tikintinin, nəqliyyat və telekommunikasiyaların əsas inkişaf sahələrini, şəhər təsərrüfatı xidmətlərini, sosial sahəni, şəhər büdcəsinin yerinə yetirilməsini əhatə edən proqram bütövlükdə yerinə yetirilmişdir. Cari il üçün yerli büdcə 59 milyard 544 milyon manat həcmində müəyyənləşdirilib və bunun 17 milyard 760 milyon manatını onun gəlirləri təşkil etməlidir.

Ötən il İngiltərənin “Tarqol investment limited” şirkəti “Azərboru” Səhmdar Cəmiyyətinin səhimlərini almışdır. Üç il ərzində o, həmin müəssisəyə 50 milyon ABŞ dolları məbləğində sərmayə qoyacaq və bundan mühüm istehsal sahələrinin yenidən qurulması üçün mərhələ-mərhələ istifadə ediləcəkdir. Bu, 1000-dən çox fəhləni sabit işlə təmin etməyə imkan verəcəkdir.

“Azəralüminium” Səhmdar Cəmiyyətində də müsbət dəyişikliklər baş vermişdir. Uzun sürən boşdayanmadan sonra 64 elektroliz vannası işə salınmış və çoxdan gözlənilən məhsulun istehsalına başlanmışdır.

Məruzəçi şəhərin əsas sənaye potensialını kimya və neft kimyası sahəsinin təşkil etdiyini bildirərək dedi ki, etilen-polietilen və superfosfat zavodları istisna olmaqla, həmin müəssisələrin işi yarıtmazdır.

Qeyd olundu ki, ötən dövrdə sahibkarlığın inkişafına da böyük diqqət yetirilmişdir. İqtisadiyyatda, nəqliyyatda, xidmətlər sahəsində və beləliklə, şəhər büdcəsinin mədaxil hissəsində özəl sektorun xüsusi çəkisi xeyli artmışdır.

Məruzəçi idmançıların nailiyyətlərindən də söz açdı və xatırlatdı ki, onlar beynəlxalq yarışlarda 23 medal qazanmışlar. Şahmatçılar Şəhriyar və Zeynəb Məmmədyarovlar beynəlxalq qrossmeyster normasını yerinə yetirmişlər. Niyaməddin Paşayev isə “Tərəqqi” medalı ilə təltif edilmişdir. Bütün bunlar gənclərin lideri, Azərbaycan MOK-un prezidenti İlham Əliyevin xidmətidir. Sumqayıtlılar onun AŞPA sədrinin müavini və Büro üzvü seçilməsi xəbərini böyük ruh yüksəkliyi ilə qarşılamışlar.

Azərbaycan Respublikasının Prezidenti Heydər Əliyevin irəli sürdüyü tələbləri və ötən il dekabrın 19-da keçirilmiş müşavirədə qarşıya qoyduğu vəzifələri rəhbər tutan sumqayıtlılar şəhərin su, qaz və elektrik enerjisi ilə təmin olunmasında müsbət nəticələrə nail olmuşlar.

Müzakirələrdə çıxış edənlər icra hakıimiyyətinin fəaliyyətini müsbət qiymətləndirdilər. Şəhərin abadlaşdırılmasına, yaşıllıqların genişləndirilməsinə diqqət xüsusi vurğulandı və bildirildi ki, mühəndis kommunikasiyaları sahəsində mühüm işlər görülmüş, tarix muzeyi tamamilə yenidən qurulmuş, min kilometrdən çox yol asfaltlanmış, yeni iş yerləri açılmışdır. Dövlətimizin başçısının şəhərin problemlərinə daimi qayğı və diqqəti xüsusi vurğulandı.