Şuşa ziyalısı: Prezidentin şəhərimizə hər səfəri mühüm hadisələrlə yadda qalır
Şuşa, 13 may, Tahir Ağaməmmədov, AZƏRTAC
Nəhayət ki, uzun illərin həsrəti sona yetdi, taleyimizə yazılan kədər sevinclə əvəzləndi. Azərbaycan tarixinə qızıl hərflərlə yazılan 8 Noyabr Zəfər Günü olmaqla, həm də qürurumuzun qayıtdığı gün kimi yaddaşlara həkk olundu. Xalqımıza yenidən doğma torpaqlara qovuşmaq sevinci müyəssər oldu.
Bunu AZƏRTAC-ın bölgə müxbirinə açıqlamasında Şuşa şəhər ziyalısı Raisə Fərəcova deyib.
Şuşa sakini bildirib ki, Qarabağın hər yerində olduğu kimi, Azərbaycanın tarixi mədəniyyət mərkəzi olan Şuşa şəhərində də Prezidentimizin tapşırığı ilə genişmiqyaslı bərpa-quruculuq işləri həyata keçirilir. Şəhərdə infrastruktur layihələri, yaşayış binalarının tikintisi ilə yanaşı, tarix və mədəniyyət abidələr də bərpa olunur. Mədəniyyət paytaxtımızda tikinti-quruculuq işləri dövlətimizin başçısının tapşırığına uyğun olaraq şəhərin tarixi memarlıq xüsusiyyətlərinə uyğun aparılır. Yuxarı Gövhər Ağa, Aşağı Gövhər Ağa, Saatlı, Çöl Qala məscidləri, Xan qızı bulağı, Molla Pənah Vaqifin muzey-məqbərə kompleksi bərpa edilib. Artıq doğma yurda qayıdan şuşalılar yeni inşa edilmiş yaşayış kompleksində yaşayır, şagirdlər yeni tikilmiş müasir məktəbdə təhsil alırlar.
“Şuşanın bərpasına, dirçəlməsinə xüsusi diqqət göstərən Prezidentin şəhərimizə hər səfəri mühüm hadisələrlə yadda qalır. Dövlətimizin başçısı və birinci xanım Mehriban Əliyeva mayın 9-da növbəti səfəri zamanı Şuşa Müalicə-Sağlamlıq Mərkəzinin, Daşaltı kənd məscidinin açılışında və inşa ediləcək dördüncü yaşayış kompleksinin təməlqoyma mərasimində iştirak etdilər. Prezidentin bu səfəri də mədəniyyət beşiyimiz üçün böyük töhfə olacaq. Şuşamızın bərpasına, inkişafına göstərdiyi diqqətə görə Prezidentimizə Şuşa ziyalısı kimi təşəkkürümü bildirirəm”, – deyə Raisə Fərəcova əlavə edib.
Bölmənin digər xəbərləri
