Sverdlovsk vilayətində görüşlər
Bakı, 8 may, Tamilla Nuriyeva, AZƏRTAC
AZƏRTAC-ın xəbər verdiyi kimi, Azərbaycan Respublikası Milli Məclisinin deputatı Mixail Zabelin cari il aprelin 22-dən 25-dək Rusiya Federasiyasının Sverdlovsk vilayətinin Yekaterinburq şəhərində olub. Səfərdən məqsəd “Böyük Qələbənin 70 illiyi: tarixi təcrübə və müasir dövrün problemləri” adlı Beynəlxalq elmi konfransın plenar iclasında iştirak etmək idi.
M.Zabelin Yekaterinburqda əvvəlcə Rusiyanın baş prokurorunun Ural Federal dairəsi üzrə müavini Yuri Ponomaryovla görüşüb. O, Azərbaycanın bu torpaqda dostluq və qardaşlıq şəraitində yaşayan müxtəlif millətlərin nümayəndələrinin doğma evi olduğunu, vətəndaşların, o cümlədən rusdilli əhalinin hüquqlarını pozan qanunların olmadığını bildirib, ölkəmizdə gedən heyrətamiz inkişafdan və bir çox başqa məsələlərdən bəhs edib.
Söhbət zamanı cari ilin aprelində Yekaterinburqda bir qrup erməninin Azərbaycan vətəndaşı E.Hüseynovu qətlə yetirməsi faktına da toxunulub. Y.Ponomaryov bu işə baxılmasını şəxsən öz nəzarəti altına götürəcəyini vəd edib.
Həmin gün axşam Mixail Zabelin Sverdlovsk İctimai Televiziyasının “Hadisələr. Aksent” proqramına, aprelin 23-də isə “Rossiya” telekanalına müsahibə verib. Müsahibələrdə o, Birinci Avropa Oyunları ərəfəsində ölkəmizin həyatında baş verən hadisələrdən söhbət açıb.
Konfransda deputat həmçinin Sverdlovsk vilayəti hökumətinin sədri Denis Paslerlə görüşüb.
Sonra o, Sverdlovsk Federal Universitetində olub, universitetin rektoru, hökumətin keçmiş sədri Viktor Kokşarovla, universitetin tələbələri, habelə Azərbaycanşünaslıq Mərkəzinin rəhbəri, beynəlxalq münasibətlər kafedrasının müdiri, professor Aleksandr Nesterovla görüşüb.
Həmin gün M.Zabelin Yekaterinburqda Azərbaycana dair kitabların böyük ekspozisiyasının açıldığı Kitabxana Mərkəzinin işi ilə tanış olub. Mərkəzin rəhbəri N.Lyakedemonskaya “Tanınmış insanların həyatı” silsiləsindən Azərbaycan xalqının ümummilli lideri Heydər Əliyev, Zərifə Əliyeva və Azərbaycan Respublikasının Prezidenti İlham Əliyev haqqında kitabların əldə edilməsində onlara kömək göstərməyi xahiş edib.
Dəfələrlə Azərbaycanda olmuş və Azərbaycan Respublikasının insan hüquqları üzrə müvəkkili Elmira Süleymanova ilə dostluq əlaqələri saxlayan Sverdlovsk vilayəti üzrə ombudsman Tatyana Merzlyakova ilə aprelin 24-də keçirilmiş görüşdə E.Hüseynovun qətlə yetirilməsi məsələsi bir daha qaldırılıb. T.Merzlyakova Yekaterinburqda Azərbaycan vətəndaşının öldürülməsi faktını nəzarət altına alacağını bildirib.
Milli Məclisin deputatı Sverdlovsk vilayəti qanunvericilik Məclisinin sədri Lyudmila Babuşkina ilə də görüşərək Azərbaycan Respublikası Milli Məclisinin sədri Oqtay Əsədovun salamını ona yetirib.
L.Babuşkinaya Milli Məclisin, Azərbaycan-Rusiya Parlamentlərarası Daimi Komissiyasının işi, əmək miqrasiyası haqqında sazişin imzalanmasında yaranan problemlər, Azərbaycan xalqının tolerantlığı və Azərbaycandakı rus diasporu haqqında məlumat verilib. Azərbaycan vətəndaşı E.Hüseynovun qətli ilə əlaqədar Yekaterinburqda yaranmış vəziyyət müzakirə olunub.
L.Babuşkina Milli Məclisin sədri O.Əsədova ən xoş arzularını yetirməyi xahiş edib və Azərbaycana səfər edəcəyinə ümidvar olduğunu bildirib. O həmçinin üzdəniraq “erməni soyqırımının” 100 illiyi ilə əlaqədar mitinq və yürüşlər keçirilməsinin vilayət rəhbərliyi tərəfindən qadağan edildiyini deyib, E.Hüseynovun qətlinin araşdırılmasına nəzarət edəcəyini bildirib.
Mixail Zabelin Azərbaycan diasporunun üzvləri ilə görüşündə ermənilərin fitnələrinə uymamağı, yuxarıda göstərilən qətlin araşdırılmasına kömək göstərməyi tövsiyə edib. Həmin gün axşam o, Azərbaycan diasporunun toy şənliyində iştirak edib.
Sverdlovsk vilayəti üzrə İstintaq İdarəsinin istintaq şöbəsinin rəhbəri podpolkovnik R.Kaşinlə də söhbət olub.
Bütün görüşlərdə Milli Məclisin deputatı Mixail Zabelin Azərbaycanda yaşayan ruslar haqqında kitablar, disklər, iyun ayında Azərbaycan Respublikasında keçiriləcək birinci Avropa Oyunlarının suvenirlərini hədiyyə edib. Azərbaycanın və onun regionlarının dinamik, geniş inkişafından söhbət açıb.
Görüşlər və söhbətlər Azərbaycanın Yekaterinburqdakı baş konsulu Sultan Qasımovun dəstəyi və bilavasitə iştirakı ilə keçirilib.
Bölmənin digər xəbərləri
