TANINMIŞ ALMAN EKOLOQU MİXAİL ZUKKOV AZƏRBAYCANA GƏLƏCƏK

27.05.2004 [23:24]
Çap et
A⁺ A^-

Tanınmış alman ekoloqu, alternativ Nobel mükafatı laureatı, Qreyfsvald Universitetinin professoru Mixail Zukkovun başçılığı ilə nümayəndə heyəti mayın 30-da Azərbaycana gələcəkdir. Almaniyanın Bakıdakı səfirliyindən AZƏRTAC-ın müxbirinə bildirmişlər ki, nümayəndə heyətinə Almaniya Mühafizə Birliyinin, Henrix Böll Cəmiyyətinin mütəxəssisləri, kinematoqrafçılar daxildir. Nümayəndə heyəti bir həftəlik səfər zamanı təbiəti mühafizə sahəsində əməkdaşlığın istiqamətlərini müəyyənləşdirmək məqsədi ilə Şirvan Milli parkında, ölkənin müxtəlif regionlarında olacaqdır. Mixail Zukkov Fondunun yaradılmasının 5 illiyinə həsr olunmuş qəbul təşkil edilməsi də nəzərdə tutulmuşdur.

Xatırladaq ki, alman ekoloqu Azərbaycan ərazisində həyata keçirilən təbiəti mühafizə layihələrində fəal iştirak edir. Onun başçılıq etdiyi Fond 2002-ci ilin mayında Bakıda “Azərbaycanın milli mədəni və təbii irsinin mühafizəsi və qorunub saxlanması - Milli Parklar Proqramı” beynəlxalq konfrasının keçirilməsinin təşəbbüsçüsüdür. Fond 2001-ci ildə ilk dəfə olaraq, Azərbaycanda ekoloji layihələrin həyata keçirilməsinə başlamışdır. İlk layihə “Ağgöl qoruğunun xilas edilməsi” adlanırdı. Azərbaycan tərəfindən layihənin əlaqələndiricisi Ekologiya və Təbii Sərvətlər Nazirliyi idi. Fond elmi tədqiqatlar aparılmasında, yerli mütəxəssislərin ixtisasının artırılmasında da nazirliyə yardım göstərir.

TANINMIŞ ALMAN EKOLOQU MİXAİL ZUKKOV AZƏRBAYCANA GƏLƏCƏK

MÜƏLLİFLƏ ƏLAQƏ

Bölmənin digər xəbərləri