TANIŞ OLUN: HƏMYERLİMİZ – TƏBABƏT PROFESSORU
Bakı, 18 aprel (AZƏRTAC). Rusiya Federasiyasında klinik cərrahiyyə üzrə işıq üzü görən üç dərslikdən birinin müəllifi həmyerlimiz, tibb elmlər doktoru, professor Yusif Əbülfət oğlu Əmiraslanovdur. Rusiyanın görkəmli təbabət alimlərinin sırasında onun soyadına rast gəlmək xoşdur. Ancaq Yusif Əbülfət oğlunun elə özünü də rusiyalı hesab etmək olar: bu il 60 illik yubileyini qeyd edən alim ömrünün təxminən 40 ilini Vətəndən kənarda çalışmışdır. Kəlbəcər rayonunda dünyaya göz açan Əmiraslanov, məhz Bakıda ali tibbi təhsil alıb, cərrah ixtisasına yiyələnib, həkimlik sənətində ilk əməli addımlarını da paytaxt klinikalarının birində atmışdır.
Qeyd etmək lazımdır ki, Azərbaycan cərrahlıq məktəbi təkcə öz respublikasında deyil, onun hüdudlarından kənarda da nüfuz qazanan xeyli yüksək ixtisaslı mütəxəssislər yetişdirmişdir. Çoxları, yəqin xatırlayırlar ki, Moskvadakı Mərkəzi Travmatologiya və Ortopediya klinikasına uzun illər bakılı professor Aydın Salar oğlu İmaməliyev rəhbərlik edib. Sümük toxumalarının köçürülməsi, orijinal süni oynaqların tətbiqi və bir çox qeyri-standart cərrahiyyə əməliyyatları onun adı ilə bağlıdır. İmaməliyevlər nəslinin uğurlarını sonrakı illərdə Azərbaycan Tibb Universitetinin məzunları davam etdirmişlər. Onlardan biri də professor Yusif Əmiraslanovdur.
Bakıdan yola düşən Yusif Əmiraslanov əvvəlcə Rusiyanın Tula vilayətində çalışmış, 1974-cü ildə isə A.V.Vişnevski adına Moskva Cərrahiyyə İnstitutunda işləməyə başlamışdır. Namizədlik dissertasiyası müdafiə etmiş, tezliklə tibb elmləri doktoru, professor adını almışdır. Onun elmi əsərləri xarici ölkələrdə də tanınmış, Yusif Əmiraslanov Nyu-York Akademiyasının akademiki seçilmişdir. Hazırda isə o, həm də Rusiya Təbiət Elmləri Akademiyasının akademikidir. Bir neçə il əvvəl Yusif Əmiraslanov Rusiya Federasiyası hökumətinin mükafatına layiq görülmüşdür.
Professor Əmiraslanov cərrahi infeksiyalar, plastik cərrahiyyə və travmatologiya problemləri üzrə öz məktəbini yaratmışdır. Onun Moskvada işləyib hazırladığı cərrahiyyə üsulları alim-cərrahın vətənində, Azərbaycanın müxtəlif klinikalarında uğurla tətbiq edilir. Professor doğma Azərbaycanda tibb elminin inkişafına böyük maraq göstərir, elmi kadrların hazırlanmasına hərtərəfli kömək edir.
250 elmi işin müəllifi olan Yusif Əmiraslanov travmatologiya və ortopediya ilə əlaqədar orijinal əməliyyatlar metodikasını işləyib hazırlayan ixtiraçı və səmərələşdirici kimi də tanınmışdır. Professor ictimai işlərlə də fəal məşğul olur: o, ixtisaslaşdırılmış jurnalın buraxılışında iştirak edir, bir sıra tibbi nəşrlərin və sənədli elmi-praktiki filmlərin müəllifidir. Həmyerlimiz Ümumrusiya Azərbaycan Konqresinin fəaliyyətindən də kənarda qalmır.
Y.Əmiraslanov həm dövlət tərəfindən, həm də peşəsi ilə bağlı bir çox mükafatlara layiq görülmüşdür. Lakin o, özü üçün ən böyük mükafatı şəfa tapmaq üçün ona müraciət edənlərin etimadında görür.
Bölmənin digər xəbərləri
