Tbilisidə Azərbaycan-Gürcüstan strateji tərəfdaşlığına həsr olunan konfrans keçirilib
Tbilisi, 17 mart, AZƏRTAC
Martın 17-də Gürcüstan Milli Akademiyasında "Azərbaycan-Gürcüstan strateji tərəfdaşlığı Cənubi Qafqazda sülh və inkişafın amili kimi" mövzusunda konfrans keçirilib.
AZƏRTAC xəbər verir ki, tədbir Azərbaycanın Gürcüstandakı səfirliyinin və Gürcüstan Milli Akademiyasının birgə təşkilatçılığı ilə keçirilib.
Akademiyanın vitse-prezidenti, akademik Roin Metreveli tədbiri açaraq konfransın keçirilməsinə göstərdiyi dəstəyə görə səfirliyə minnətdarlıq edib, bunu Gürcüstan-Azərbaycan strateji tərəfdaşlığının daha bir nümunəsi kimi qiymətləndirib. O deyib ki, Azərbaycan ilə Gürcüstan bölgədə sabitliyin təmin olunması və inkişafı üçün böyük işlər görüblər. Bu cür tədbirlər regionun inkişafı üçün elmi və hüquqi baza yarada bilər. Əsas məqsəd də inkişafımızın elmi əsaslarını hazırlamaqdır.
Sonra Azərbaycanın Gürcüstandakı səfiri Faiq Quliyev çıxış edərək ölkələrimiz arasındakı qədim dostluq və qonşuluq münasibətlərindən danışıb. Bildirib ki, Azərbaycan ilə Gürcüstan təkcə coğrafi baxımdan yaxın deyillər, bizim xalqlarımız oxşar taleləri yaşayırlar.
Diplomat deyib ki, Azərbaycan və Gürcüstanın birgə iştirakı ilə həyata keçirilən beynəlxalq əhəmiyyətli enerji və nəqliyyat, eləcə də logistik layihələr təkcə bizim ölkələrimiz üçün deyil, bütövlükdə regionun və Avropanın inkişafında mühüm rol oynayır. O, Bakı-Tbilisi-Ceyhan neft, Bakı-Tbilisi-Ərzrum qaz, Bakı-Tbilisi -Qars dəmir yolu, TAP və TANAP kimi layihələrin əhəmiyyətini qeyd edib.
Səfir Ermənistanın işğalçılıq siyasəti barədə ətraflı məlumat verib və bu siyasətin regionunun inkişafına ciddi mane, təhlükəsizliyə ciddi təhdid olduğunu bildirib. Qeyd edib ki, Azərbaycan Ordusunun 44 günlük Vətən müharibəsində əldə etdiyi parlaq Qələbə təkcə Azərbaycanın deyil, region ölkələrinin də inkişafında mühüm rol oynayır. Bu Qələbə regionun inkişafı üçün yeni imkanlar açır.
"Gürcüstan Milli Elmlər Akademiyasında tanınmış elm xadimlərinin, siyasətçilərin və iqtisadçıların iştirakı ilə keçirilən bu konfrans və müzakirə olunan məsələlər bizim regionun davamlı inkişafı və çiçəklənməsinə təkan verəcək, təhlükəsiliyimiz üçün möhkəm baza yaradacaq", - deyə F.Quliyev vurğulayıb.
Sonra akademik Rion Metreveli, Qafqazın Tarixi, Geosiyasi və İqtisadi İnkişafı Mərkəzinin direktoru Nikolaz Metreveli məruzə ilə çıxış ediblər.
Məruzələr ətrafında çıxışlar olub.
Çıxış edənlər bildiriblər ki, Azərbaycan xalqının ümummilli lideri Heydər Əliyev və onun siyasi kursunun layiqli davamçısı Prezident İlham Əliyev regionun inkişafı üçün böyük işlər görüblər. Hazırda həyata keçirilən irimiqyaslı enerji və nəqliyyat layihələri Ulu Öndərin uzaqgörən xarici siyasətinin bəhrəsidir.
Sonda səfir məruzələrdə və çıxışlarda səslənən fikirlərin əhəmiyyətini qeyd edib, akademiyanın alimlərini Azərbaycana səfərə dəvət edib.
Növbəti konfransın Bakıda keçirilməsi ilə bağlı təklif irəli sürülüb.
Eyni zamanda, elm xadimlərinin, hər iki ölkənin ali təhsil müəssisələri, elmi yaradıcılıq mərkəzlərinin professor və tələbələrinin qarşılıqlı səfərlərinin təşkili barədə razılıq əldə olunub.
Xətayi Əzizov
AZƏRTAC-in xüsusi müxbiri
Tbilisi
Bölmənin digər xəbərləri
