Tbilisidəki 64 saylı məktəbdə Xocalı soyqırımı qurbanlarının xatirəsi anılıb
Tbilisi, 25 fevral, AZƏRTAC
Fevralın 25-də Gürcüstanın paytaxtı Tbilisi şəhərindəki 64 saylı tam orta məktəbdə Xocalı soyqırımının 27-ci ildönümü ilə əlaqədar tədbir keçirilib.
AZƏRTAC-ın və 64 saylı məktəbin Azərbaycan dili bölməsinin birgə təşkil etdikləri tədbirdə Azərbaycanın Gürcüstandakı səfirliyinin əməkdaşları, məktəbin pedaqoji kollektivi, azərbaycanlı, gürcü, rus və digər millətlərdən olan şagirdlər, universitet tələbələri iştirak ediblər.
Əvvəlcə şəhidlərin xatirəsi bir dəqiqəlik sükutla yad olunub.
Məktəbin dərs hissə müdiri Gülnaz Ağayeva çıxış edərək Ermənistanın Azərbaycana qarşı həyata keçirdiyi işğalçılıq siyasətindən danışıb, Xocalı faciəsinin bu siyasətin davamı olduğunu diqqətə çatdırıb. Bildirib ki, bütün çətinliklərə, maneələrə baxmayaraq, Azərbaycan dövləti Prezident İlham Əliyevin rəhbərliyi ilə Xocalı soyqırımının dünyada tanıdılması, Ermənistan-Azərbaycan Dağlıq Qarabağ münaqişəsi barədə həqiqətlərin beynəlxalq ictimaiyyətə çatdırılması, işğal edilmiş torpaqlarımızın azad olunması üçün bütün zəruri addımları atır və atacaq.
Sonra AZƏRTAC-ın xüsusi müxbiri Xətayi Əzizov çıxış edərək Azərbaycan-Gürcüstan dostluğunun tarixinə nəzər salıb, bu iki xalqın qədim dövlətçilik tarixi, müstəqillik uğrunda mübarizəsindən bəhs edib. Bildirib ki, 1920-ci ildə qəhrəman gürcü xalqı bolşevik işğalına qarşı mübarizə aparıb. Məhz fevralın 25-də yüzlərlə gənc gürcü vətənin azadlığı naminə canından keçib. O zaman sovet ordusunun başında dayanan ermənilər dinc insanları qətlə yetiriblər.
Ermənilər Azərbaycan xalqına qarşı zaman-zaman soyqırımları törədiblər. 1918-ci il martın 31-də Bakıda, Şamaxıda, Lənkəranda və digər bölgələrdə minlərlə azərbaycanlı qətlə yetirilib. 1992-ci il fevralın 25-dən 26-na keçən gecə Azərbaycanın Xocalı şəhəri yerlə-yeksan edilib, dünyada misli görünməmiş qətliam törədilib. XX əsrin sonunda dünyanın gözü qarşısında baş verən, xüsusi qəddarlığı və amansızlığı ilə seçilən Xocalı soyqırımı təcavüzkar erməni siyasətinin iç üzünü bir daha açıb göstərdi. Bu ağır cinayətə görə siyasi-hüquqi məsuliyyət birbaşa Ermənistanın o zamankı və sonrakı rəhbərliyinin, həmçinin Dağlıq Qarabağdakı separatçı rejimin üzərinə düşür.
Diqqətə çatdırılıb ki, son illər Heydər Əliyev Fondunun vitse-prezidenti Leyla Əliyevanın təşəbbüsü ilə dünyada geniş vüsət almış “Xocalıya ədalət!” beynəlxalq təbliğat kampaniyasına Azərbaycanda və xaricdə, eləcə də Gürcüstanda fəaliyyət göstərən çoxsaylı vətəndaş cəmiyyəti institutları da qoşulub. Onlar ayrı-ayrı ölkələrin dövlət qurumlarını və ictimaiyyətini, beynəlxalq təşkilatları bu faciəyə adekvat qiymət verməyə çağırırlar.
Gürcüstanın Azərbaycanlı Müəllimlər İttifaqının sədri Səadət Zeynalqızı Xocalı soyqırımı ilə əlaqədar məktəblərdə tədbirlər keçirilməsinin vacibliyini qeyd edib. Bildirib ki, gənc nəslin məlumatlandırılması tariximizin şanlı və qanlı səhifələri barədə məlumatların gələcək nəsillərə çatdırılması baxımından mühüm əhəmiyyət kəsb edir. O, Gürcüstan parlamentində Xocalı soyqırımının tanıdılması barədə qərar qəbul edilməsi üçün səylərin artırılmasının vacibliyini vurğulayıb.
Məktəbin direktoru Tamara Mamsikaşvili çıxışında Azərbaycan və gürcü xalqlarının dostluğundan söhbət açıb, bu cür tədbirlərin əhəmiyyətini xüsusi qeyd edib.
Azərbaycanın Gürcüstandakı səfirliyinin məsul əməkdaşı Fəxri Hacıyev Ermənistan silahlı qüvvələrinin Dağlıq Qarabağ və ətraf ərazilərdə azərbaycanlılar yaşayan bütün yaşayış məntəqələrini bir-birinin ardınca işğal etdiklərini diqqətə çatdırıb. Bildirib ki, qısa bir müddətdə Xocavənd, Cəmilli, Meşəli, İmarət-Qərvənd, Kərkicahan, Malıbəyli, Quşçular, Qaradağlı və digər kəndlər dağıdılıb, dinc sakinlər qətlə yetirilib və əsir götürülüb, onların əmlakı qarət edilib.
1992-ci il fevralın 25-dən 26-na keçən gecə Ermənistan dövlətinin nizami hərbi birləşmələri keçmiş sovet ordusunun Xankəndi şəhərində yerləşən 366-cı motoatıcı alayının iştirakı ilə aylarla mühasirədə saxlanılan Xocalıya hücum edərək, bir gecənin içində şəhəri yerlə-yeksan ediblər. Bu qanlı aksiya zamanı dinc əhaliyə amansızlıqla divan tutulub, 613 nəfər qətlə yetirilib, 1275 nəfər girov götürülüb. Onlardan 150 nəfərin taleyi hələ də məlum deyil. Qətlə yetirilənlərin 63-ü uşaqlar, 106-sı qadınlar, 70-i qocalar idi. Hərbi təcavüz nəticəsində 8 ailə tamamilə məhv edilib.
Azərbaycan televiziyasının Gürcüstan üzrə xüsusi müxbiri Şahismayıl Şəmmədoğlu çıxışında erməni faşistlərinin Azərbaycanın Dağlıq Qarabağ və Gürcüstanın Abxaziya bölgəsində törətdikləri cinayətlərdən danışıb, bütün çətinliklərə baxmayaraq, hər iki ölkənin müstəqil dövlət kimi dünya birliyində qazandığı uğurları qeyd edib. Vurğulayıb ki, bu gün Azərbaycanın və Gürcüstanın birgə iştirakı ilə həyata keçirilən Bakı-Tbilisi-Ceyhan neft, Bakı-Tbilisi-Ərzurum qaz kəmərləri, Bakı-Tbilisi-Qars dəmir yolu və digər layihələr regionun təhlükəsizliyinə, sabitliyə, iqtisadi inkişafa və xalqlarımızın rifah halının yaxşılaşmasına xidmət edir.
Sonra məktəbin müəllimləri Tərlan Hüseynova, Batıxan Xiyalov və başqalarının mövzu ilə bağlı çıxışları dinlənilib.
Məktəb şagirdləri Xocalı faciəsinə həsr olunmuş şeirlər söyləyiblər.
Şəhidlərin ruhuna dualar oxunub, ehsan süfrəsi açılıb.
Bölmənin digər xəbərləri
