“Təbiəti dəyişmə, özünü dəyiş!” devizi altında ətraf mühit sərgisi keçirilir VİDEO
Bakı, 14 noyabr, AZƏRTAC
Noyabrın 14-də “Bakı Ekspo Mərkəzi”ndə “Təbiəti dəyişmə, özünü dəyiş!” şüarı altında “Caspian Ecology” IX Azərbaycan Beynəlxalq Ətraf Mühit Sərgisi işə başlayıb. Sərginin keçirilməsində məqsəd ətraf mühitin mühafizəsi sahəsində innovativ texnologiyaları tətbiq edən beynəlxalq və yerli şirkətləri, dövlət və qeyri-hökumət təşkilatlarını bir araya gətirmək, perspektivli əməkdaşlıq əlaqələri qurmaq və təcrübə mübadiləsi aparmaqdır. Tədbir Ekologiya və Təbii Sərvətlər Nazirliyinin və “Caspian Event Organisers” şirkətinin təşkilatçılığı, IDEA İctimai Birliyinin dəstəyi ilə keçirilir.
AZƏRTAC xəbər verir ki, builki sərgidə Azərbaycan da daxil olmaqla Türkiyə, Rusiya, Almaniya, Böyük Britaniya, Finlandiya, İtaliya, Ukrayna olmaqla ümumilikdə 8 ölkədən 43 şirkət iştirak edir.
Tədbirdə qonaqları salamlayan ekologiya və təbii sərvətlər naziri Muxtar Babayev sərginin keçirilməsinin nazirlik üçün əlamətdar hadisə olduğunu bildirib: “Çox fərəhləndirici haldır ki, ölkəmizdə ətraf mühit mövzusunda sərgilərin keçirilməsi artıq ənənəyə çevrilib və bu sərgilər beynəlxalq şirkətlərin maraq dairəsinə daxil olub. Azərbaycan bu sahəyə çox böyük önəm verən ölkələrdən biridir. Ekologiya mövzusuna həsr olunmuş sərgilərin keçirilməsi ətraf mühitə dost texnologiyaların nümayiş etdirilməsi ilə yanaşı, əhalinin ekoloji maarifləndirilməsi baxımından da böyük əhəmiyyət daşıyır”.
Nazir sərginin yüksək səviyyədə təşkilinə görə “Caspian Event Organisers” şirkətinə və verdiyi dəstəyə görə IDEA İctimai Birliyinə bir daha öz təşəkkürünü bildirib.
“Caspian Event Organisers” şirkətinin region üzrə direktoru Edvard Stroun sərginin birinci iş günü İtaliya Ticarət Agentliyi tərəfindən təşkil olunan “B2B” formatlı ikitərəfli işgüzar görüşlər keçiriləcəyini qeyd edib.
Sonra ekologiya və təbii sərvətlər nazirinin iştirakı ilə sərgiyə baxış keçirilib.
Qeyd edək ki, 2010-cu ildən etibarən mütəmadi olaraq keçirilən sərginin əhatə dairəsi bu il daha da genişləndirilib. Nümayiş olunacaq yeni texnologiyalar ətraf mühitin qorunmasına, sağlamlaşdırılmasına yönəlib. Sərgidə plastik və polietilen məhsulların utilizasiyası, ekoloji təmiz içməli su istehsalı, sudan təkrar istifadə, ekoloji təmiz qida məhsulları, alternativ enerji texnologiyaları, yaşıl landşaft dizaynı və ekoturizm ilə bağlı müxtəlif istiqamətlərdə ekoloji stendlər nümayiş olunur.
Sərgidə Ekologiya və Təbii Sərvətlər Nazirliyi, Fövqəladə Hallar Nazirliyi, Naxçıvan Muxtar Respublikası Ekologiya və Təbii Sərvətlər Nazirliyi ilə yanaşı “Azərsu” ASC, BP şirkəti, “Damla” İctimai Birliyi, Almaniya Beynəlxalq Əməkdaşlıq Cəmiyyəti (GİZ), “SOCAR Polymer” MMC, “Təmiz Şəhər” Açıq Səhmdar Cəmiyyəti kimi dövlət qurumları və şirkətlər iştirak edirlər. İlk dəfə olaraq sərgidə “İçərişəhər” Dövlət Tarix-Memarlıq Qoruğunun stendi də təqdim olunur.
Sərgidə ilk dəfə iştirak edənlər arasında Azərbaycanın Advanced Industrial Solutions, Azеrеkov, AzerGold, Oreon Commerce, Suyum AZ Coca-Cola Azerbaijanla yanaşı, Türkiyənin HAUS və Planettek, eləcə də Finlandiyanın Finnish Water Forum, İtaliyanın Maire Tecnimont şirkətləri yer alır.
“Caspian Ecology” IX Ətraf Mühit Sərgisi çərçivəsində noyabrın 15-də “Balıq ovlamadan davamlı akvakulturaya və dəniz ekosistemlərinin qorunmasına doğru” mövzusunda beynəlxalq elmi konfrans keçiriləcək. “Xəzər regionunda akvakulturanın inkişaf prioritetləri və imkanları” və “Regional problemlərin müəyyən edilməsi, idarəetmə vasitələri və balıq ehtiyatlarının mühafizəsi” sessiyalarından ibarət olacaq konfransın məqsədi Xəzər dənizində balıq ehtiyatlarının, xüsusilə də nərəcinsli balıqların kəskin azalması və qeyri-qanuni balıq ovu problemlərinin həlli, akvakulturanın inkişafı və s. məsələlərin müzakirəsindən ibarətdir.
Tədbirdə bir sıra ölkələrin tanınmış mütəxəssisləri və balıqçılıq təsərrüfatı institutlarının rəhbərlərinin iştirakı gözlənilir.
Noyabrın 16-da “Qafqazda vəhşi təbiətin bərpası üzrə əməkdaşlıq” mövzusunda beynəlxalq elmi konfrans keçiriləcək. Konfransın məqsədi bioloji müxtəlifliyin qorunması, regionun təbii bərpa sahəsində potensialının inkişafı üçün prioritetləri müəyyənləşdirmək və regional əməkdaşlığı genişləndirməkdir. Tədbirdə bir sıra ölkələrin tanınmış mütəxəssislərinin iştirakı gözlənilir.
Beləliklə, beynəlxalq “Caspian Ecology” sərgisi işgüzar əlaqələrin genişləndirilməsi, təcrübə mübadiləsi, habelə sənayedəki yeni avadanlıq və təmayüllərlə tanışlığa imkan yaratmaqla yanaşı, ətraf mühitin yaxşılaşdırılması istiqamətində görülən işlərə də əlavə təkan verəcək.
Ümumilikdə tədbirdə təbii resurslardan səmərəli istifadə sahəsində ən son texnologiyalar, sülb (bərk) tullantıların toplanması və utilizasiyası, emalı üçün nəzərdə tutulan avadanlıqlar, sutəmizləmə sistemləri, neft və qaz kəşfiyyatı və emalı xidmətləri, kağız, karton istehsalı, eləcə də bir sıra digər məhsullar təqdim ediləcək.
“Caspian Ecology” IX Azərbaycan Beynəlxalq Ətraf Mühit Sərgisi üç gün davam edəcək.
Bölmənin digər xəbərləri
