TƏBİİ FƏLAKƏTİN NƏTİCƏLƏRİ ARADAN QALDIRILIR
Təbii fəlakətin nəticələrini aradan qaldırmaq üçün Azərbaycan Prezidenti İlham Əliyevin tapşırığı ilə Fövqəladə Hallar Nazirliyinin, “Azərenerji”, “Azəriqaz”, “Azərsu” səhmdar cəmiyyətlərinin rəhbərləri dərhal Əli Bayramlıya gəlmiş, vəziyyətlə yerində tanış olmuş, operativ tədbirlərin görülməsini təmin etmişlər. İlk növbədə sakinlər təhlükəli ərazilərdən köçürülərək müvəqqəti sığınacaqlarda yerləşdirilmişlər. Həyətləri və zirzəmiləri basmış su güclü nasoslar vasitəsilə yaxınlıqdakı Hacıqabul gölünə və baş kollektora axıdılmışdır.
Şəhər icra hakimiyyəti başçısının birinci müavini, rayon fövqəladə hallar komissiyasının sədri Samit Abıyev demişdir ki, görülmüş operativ tədbirlər sayəsində oktyabrın 11-də axşam saat 20-dək şəhərin qaz, su və elektrik enerjisi təchizatı, Hacıqabul-Əli Bayramlı dəmir yolu xəttinin dağılmış hissəsi bərpa olunmuşdur. Oktyabrın 12-dən şəhərin bütün idarə və müəssisələri normal rejimdə işləyir. Dövlət komissiyası dəymiş ziyanın həcmini müəyyənləşdirir.
Bölmənin digər xəbərləri
