Tələbələrin “Navetra” layihəsi yollardakı tıxacları proqnozlaşdırıb onların qarşısını ala bilər
“Xudafərin BHOS” komandası “TEKNOFEST 2025” də “Ağıllı nəqliyyat” kateqoriyası üzrə 3-cü yeri tutub
Bakı, 26 sentyabr, Xatirə Cəfərova, AZƏRTAC
“TEKNOFEST 2025” Aerokosmik və Texnologiya Festivalında Bakı Ali Neft Məktəbinin (BANM) “Xudafərin BHOS” komandası “Ağıllı nəqliyyat” kateqoriyası üzrə 3-cü yeri tutub. Komandanın üzvləri proseslərin avtomatlaşdırılması mühəndisliyi ixtisasının V kurs tələbəsi Cəbrayıl Qasımlı, kompüter mühəndisliyi ixtisasının V kurs tələbəsi Əlehsan Əliyev, proseslərin avtomatlaşdırılması mühəndisliyi ixtisasının IV kurs tələbəsi Aysel Rəhimli, kompüter mühəndisliyi ixtisasının III kurs tələbəsi Emil Abdullayevdir.
Komandanın mentoru BANM-in İnnovasiya və Tədqiqatlar Mərkəzinin müdiri Emiliya Əhmədova AZƏRTAC-a müsahibəsində təqdim olunan layihə barədə məlumat verib: “Navetra” ağıllı nəqliyyat idarəetmə tətbiqidir. Məqsədimiz yalnız real vaxt vəziyyətini göstərmək deyil, həm də süni intellektlə yaxın gələcəkdə yarana biləcək tıxacları proqnozlaşdırıb onların qarşısını almaqdır. Məlumatları həm keçmiş yol məlumatlarından, həm də mövcud API-lərdən gələn real vaxt axınlarından toplayırıq. Bu keçmiş məlumatlar üzərində ML modellərimizi öyrədir, real vaxt göstəriciləri ilə də dinamik proqnoz və tövsiyələr veririk. İstifadəçi çıxış vaxtını və təyinat ünvanını daxil edir, sistem isə ən uyğun marşrutu və çıxış vaxtını təklif edərək pik saatlardan əvvəl yüklənməni balanslaşdırır, şəhərdaxili hərəkəti daha səmərəli edir və yanacaqla vaxt itkilərini azaldır”.
Bölmənin digər xəbərləri
