TELERADİO MƏKANINDAKI MÖVCUD VƏZİYYƏTLƏ BAĞLI MƏTBUAT KONFRANSI KEÇİRİLMİŞDİR
Şuranın sədri Nuşirəvan Məhərrəmli bildirmişdir ki, hər bir telekanal teleradio sahəsində dövlət siyasətini həyata keçirən qurumun qərarlarını yerinə yetirməyə borcludur. O, Bi-Bi-Si, Azadlıq və Amerikanın səsi radiolarının orta və qısa dalğada sərbəst yayımlandığı halda, yerli radioların da efir məkanından istifadə etməsinin qanunazidd olduğunu bildirmiş və gələn il yanvarın 1-dən bu cür yayımları həyata keçirən yerli teleradioların xarici ölkə verilişlərini yayımlamasının dayandırılacağını qeyd etmişdir.
Bİr çox televiziya və radioların lisenziyasının müddətinin bitdiyi və ya heç olmadığı barədə danışan N.Məhərrəmli, ANS ÇM radiostansiyası və ANS telekanalının, Lider televiziyasının və radiosunun, Lənkəran, “Aygün” televiziyalarının və “Avropa plyus” radiostansiyasının adını çəkərək bildirmişdir ki, yerli teleradioların lisenziya məsələsi həll edildikdən sonra xarici teleradioların lisenziya məsələsinə baxılacaqdır.
Bundan başqa, bir sıra teleradioların sənədlərinin qaydasında olmaması və ya onların təsisçiləri ilə bağlı bəzi problemlərin mövcudluğu vurğulanmış, keçirilmiş monitorinqlər nəticəsində ANS, ATV, SPACE və LİDER telekanallarının cərimələndiyi diqqətə çatdırılmışdır.
Azərbaycan dilindən efirdə istifadə məsələsinə toxunularkən SPACE telekanalının rəhbərliyinə bu barədə xəbərdarlıq olunduğu bildirilmiş, cari ildə Şura tərəfindən ekspert qrupunun yaradılacağı, göstəriləcək filmlərin yaş həddinə görə müəyyənləşdiriləcəyi vurğulanmışdır.
Bildirilmişdir ki, cari ildə 8 kabel televiziyasına və 1 kart satışı ilə məşğul olan şirkətə lisenziya verilmişdir. Şəkidə və Yevlaxda isə yeni telekanallar açılmışdır.
Sonda jurnalistləri maraqlandıran suallar cavablandırılmışdır.
