Təlim, Tədris və Sertifikatlaşdırma İdarəsində “ARDNŞ-in Ekoloji Siyasəti” üzrə kurs təşkil olunmuşdur
Bakı, 29 avqust (AZƏRTAC). ARDNŞ-in Təlim, Tədris və Sertifikatlaşdırma İdarəsində (TTSİ) ekologiya sahəsində calışan mütəxəssislər üçün “ARDNŞ-in Ekoloji Siyasəti” mövzusunda maarifləndirmə kursu təşkil olunmuşdur.
AZƏRTAC xəbər verir ki, kurs şirkətin tabeliyində olan 10 müəssisənin sifarişi əsasında həyata keçirilmişdir. Dinləyicilərin praktiki biliklərinin artırılması məqsədilə Ekologiya İdarəsinin Ekoloji ölçmə və tullantıların idarə olunması Departamentinə, Ekoloji monitorinq Departamentinin Kompleks tədqiqatlar Laboratoriyasına, həmçinin “Ekoloji Park”a ekskursiyalar nəzərdə tutulmuşdur. Sonda kursu müvəffəqiyyətlə bitirən dinləyicilərə sertifikatlar təqdim olunacaqdır. TTSİ-də ekologiya səhəsində həmçinin TS EN ISO 14001 Ekologiya İdarəetmə Sistemi, avtomobildən atmosferə atılan işlənmiş qazların miqdarının ölçülməsi, tullantıların idarə olunması və qazma işləri aparılan zaman ətraf mühitə təsir edən tullantıların idarə olunması üzrə təlimatlandırma kursları da keçirilir. Bu kursların təşkil olunmasında əsas məqsəd müvafiq qurumların və işçilərin tullantıların idarə edilməsi sahəsində biliklərinı artırmaqla, təhlükəli tullantıların zərərsizləşdirilməsi, ekoloji maarifləndirmə məsələləri üzrə vərdişlərin aşılanması, ekoloji problemlərin yaranmasının səbəblərini və həlli yollarını müdavimlərlə müzakirə etməkdir. İlin sonunadək ətraf mühitin mühafizəsi, neft və neft məhsulları ilə çirklənmiş ərazilərin təmizlənməsi, ekoloji vəziyyətin yaxşılaşdırılması istiqamətində TTSİ-də yeni kursların təşkil olunması nəzərdə tutulmuşdir.
Bölmənin digər xəbərləri
