Tərtərli fermer: Növbəli əkin sisteminin tətbiqi yüksək məhsuldarlığa səbəb olur VİDEO
Tərtər, 17 dekabr, Tahir Ağaməmmədov, AZƏRTAC
Aqrar sahəyə göstərilən dövlət dəstəyinin nəticəsidir ki, fermer və torpaq mülkiyyətçiləri öz təsərrüfatlarını ilbəil genişləndirir, kənd təsərrüfatı məhsulları istehsalını artırırlar. Bölgələrdə fermerlər tərəfindən yaradılan iri, çoxsahəli təsərrüfatlarda növbəli əkin sisteminin tətbiqi, əkinlərin planlı təşkili, düzgün aqrotexniki qulluq yüksək məhsuldarlığa səbəb olmaqla, ölkəmizdə ərzaq təhlükəsizliyinə xidmət edir.
Tərtər rayonunun Bəyimsarov kənd sakini Fazil Vəliyev də 150 hektardan artıq sahəni əhatə edən təsərrüfatda əsasən buğda, pambıq və günəbaxan bitkiləri becərərək, uğurlu nəticələrə nail olub.
Fazil Vəliyev AZƏRTAC-ın bölgə müxbiri ilə söhbətində bildirib ki, cari ildə 90 hektara yaxın sahədə çiyid səpini həyata keçirib. Aqrotexniki qaydalara düzgün əməl edilməsi sayəsində tarlalarda bol məhsul yetişdirən fermer artıq 48,3 hektarda pambıq yığımını başa çatdırıb. "Hər hektardan orta hesabla 55 sentner məhsul əldə etmişik. Yaxın günlərdə ikinci yığım da yekunlaşacaq", - deyə fermer bildirib.
Yığım başa çatmış sahələrdə xüsusi aqreqat vasitəsilə pambığın çöpü doğranaraq torpağa verilir. Bu tədbir torpağın humus qatını zənginləşdirərək onun münbitliyini artırır. Tərtərli fermerin təsərrüfatında gələn ilin pambıq əkininə də hazırlıq görülür. Belə ki, çiyid səpiləcək 105 hektarda şum aparılıb. Hazırda isə arat işləri həyata keçirilir.
Təsərrüfatın əsasını təşkil edən bitki növlərindən biri də taxılçılıqdır. 32 hektarda taxıl yetişdirən fermer səpin zamanı buğdanın "Azəri" sortundan olan toxumdan istifadə edib. Suvarma, yemləmə gübrələrinin verilməsi, taxılın məhsuldarlığına və keyfiyyətinə təsir edən xəstəlik və zərərvericilərə, alaq otlarına qarşı mübarizə tədbirləri vaxtlı-vaxtında aparılıb. Nəticədə zəmilərdə bol məhsul yetişib. Hər hektardan orta hesabla 62 sentner buğda götürülüb. 2019-cu təsərrüfat ili üçün 20 hektarda buğda səpini də başa çatdırılıb.
Rayonda son illər günəbaxan bitkisinin becərilməsinə maraq artıb. Fazil Vəliyev də bu il 40 hektar günəbaxan becərib. Hər hektardan orta hesabla 33 sentner məhsul əldə edərək, rayondakı emal müəssisəsinə təhvil verib.
Fazil Vəliyev yüksək məhsuldarlığa aqrotexniki tədbirlərin, o cümlədən şum, suvarma, səpin işlərinin düzgün və vaxtında aparılması, torpağa üzvi və mineral gübrələrin verilməsi, ən əsası isə növbəli əkin sisteminin tətbiqi sayəsində nail olduğunu deyib. Bildirib ki, eyni sahədə bir bitkini təkrar əkib-becərdikdə məhsuldarlıq aşağı düşür. Növbəli əkin sisteminin tətbiqi nəticəsində isə torpağın təbii münbitliyi artır və bununla da becərilən kənd təsərrüfatı bitkilərinin məhsuldarlığı yüksəlir.
Bölmənin digər xəbərləri
