Təsviri sənət istiqaməti üzrə qabiliyyət imtahanı verəcək abituriyentlərin nəzərinə
Bakı, 30 iyun, AZƏRTAC
Təsviri sənət istiqamətində 10, 11 və 12-ci komissiyalar üzrə Bakı şəhərində qabiliyyət imtahanı verən abituriyentlər (subbakalavrlar) qabiliyyət imtahanına buraxılış vərəqələrini Dövlət İmtahan Mərkəzinin (DİM) saytından çap edə bilərlər.
Bu barədə AZƏRTAC-a DİM-dən məlumat verilib.
Buraxılış vərəqəsində imtahanın keçiriləcəyi tarix, yer və saat göstərilir. 10, 11, 12, həmçinin 15-ci komissiyalardan qeydiyyatdan keçmiş abituriyentlər iki fəndən imtahan verirlər. 10, 11 və 15-ci komissiyalar üzrə abituriyentlər rəsm və rəngkarlıq, 12-ci komissiya üzrə isə rəsm və yapma fənlərindən qabiliyyət imtahanı verirlər. Rəsm fənnindən 6 bal və daha yuxarı qiymət almış abituriyentlər ikinci fənn üzrə qabiliyyət imtahanında iştirak edirlər. 14-cü komissiya üzrə imtahan verən abituriyentlərin qabiliyyət imtahanına buraxılış vərəqələri növbəli şəkildə ardıcıllıqla yerləşdirilir. 14-cü komissiya üzrə qeydiyyatdan keçmiş, iyulun 6-7-də qabiliyyət imtahanında iştirak edəcək abituriyentlərin növbəti hissəsi imtahana buraxılış vərəqəsini çap edə bilərlər. 15-ci komissiyanın müsbət qiyməti 14-cü komissiyaya da şamil olunur. Hər iki komissiya üzrə qeydiyyatdan keçmiş və 15-ci komissiya üzrə müvəffəq qiymət almamış abituriyentlərin 14-cü komissiya üzrə qabiliyyət imtahanına buraxılış vərəqəsi tezliklə abituriyentlərin qeydiyyatdan keçdiyi səhifəyə yerləşdiriləcək.
Abituriyentlər imtahana aşağıda qeyd olunan sənədləri gətirməlidirlər:
- Şəxsiyyəti təsdiq edən sənədin əsli
- Qabiliyyət imtahanına buraxılış vərəqəsi
Qabiliyyət imtahanlarının məzmunu, qiymətləndirmə meyarları və qəbul proqramları haqqında məlumatlar “Abituriyent” jurnalının 2026-cı ildə çap olunan xüsusi buraxılışlarında verilib.
Qabiliyyət imtahanlarının qrafiki haqqında məlumatla buradan tanış ola bilərsiniz. Qrafik mütəmadi olaraq yenilənir və digər imtahanların tarixləri də müəyyən olduqca cədvələ əlavə ediləcək.
Bölmənin digər xəbərləri
