Tokio Paralimpiadası: Para-atletimiz Oloxan Musayev yeddinci olub
Bakı, 30 avqust, AZƏRTAC
Azərbaycan para-atleti və komandamızın bayraqdarı Oloxan Musayev Tokio Paralimpiadasının disk atma yarışlarında çıxış edib.
AZƏRTAC xəbər ki, təmsilçimiz 37,92 metr nəticə ilə yeddinci olub.
Yarışın qalibi braziliyalı Klaudiney Batista dos Santos olub - 45,59 metr. Para-atlet, həmçinin Paralimpiya rekordu da müəyyənləşdirib.
Təmsilçimiz bir neçə gün əvvəl nüvə itələmə yarışlarında beşinci olmuşdu.
Azərbaycanın komandasının hesabında 13 medal var. Onlardan 9-u qızıl, 4-ü isə bürünc medaldır. Belə ki, paracüdoçular Şəhanə Hacıyeva (48 kq), Sevda Vəliyeva (52 kq), Xanım Hüseynova (63 kq), Vüqar Şirinli (60 kq), Hüseyn Rəhimli (81 kq), Dürsədəf Kərimova (70 kq-dan yuxarı) qızıl, Namiq Abaslı (66 kq) və İlham Zəkiyev (100 kq-dan yuxarı) bürünc medala sahib olublar. Yüz metr məsafəyə üzgüçülük yarışlarında Raman Saleh Paralimpiya çempionu adını qazanıb. Nizə atma yarışlarında dünya rekordu müəyyənləşdirən para-atletimiz Həmid Heydəri qızıl medala sahib olub. Para-atlet Elvin Astanov nüvə itələmə yarışlarında birinci, Səid Nəcəfzadə isə uzunluğa tullanmada üçüncü yeri tutub. Pauerliftinqçi Pərvin Məmmədov (49 kq) isə fəxri kürsünün üçüncü pilləsinə qalxıb.
“Tokio-2020”də ölkəmizi idmanın 6 növündə 47 kateqoriya üzrə rekord sayda - 36 idmançı təmsil edəcək. Atletlərimizin 24-ü kişi və 12-si qadındır.
XVI Yay Paralimpiya Oyunları sentyabrın 5-dək davam edəcək.
Bölmənin digər xəbərləri
