“Turizm ili” çərçivəsində gənclərin Mərdəkana ekskursiyası təşkil olunmuşdur
Bakı, 27 iyul (AZƏRTAC). “Turizm ili” çərçivəsində Binəqədi və Xəzər rayon gənclər və idman idarələrinin birgə təşkilatçılığı ilə gənclərin asudə vaxtlarının səmərəli keçirilməsi məqsədilə ekskursiya təşkil olunmuşdur.
AZƏRTAC xəbər verir ki, iyulun 27-də ekskursiyanın ilk mərhələsində gənclər Qala Arxeoloji-Etnoqrafik Muzey Kompleksi ilə tanış olmuşlar. Gənclərə muzeyin yaradılması, buradakı eksponatlar haqqında ətraflı məlumat verilmişdir. Qeyd olunmuşdur ki, muzey 2008-ci ildə Heydər Əliyev Fondunun təşəbbüsü ilə əsaslı təmir və bərpa olunmuşdur.
Sonra gənclər Mərdəkan qalasında olmuşlar. Bələdçi qalanın yaranma tarixi, müdafiə xarakterli olması, strateji mövqeyi haqqında ətraflı danışmışdır. Vurğulanmışdır ki, qalanın hazırda əsaslı təmirə böyük ehtiyacı vardır.
Ekskursiyanın üçüncü mərhələsində gənclər Mərdəkan Dendrarisinə gəlmişlər. Gənclər burada adları “Qırmızı kitab”a düşmüş nadir flora və fauna nümunələri ilə tanış olmuş və Murtuza Muxtarovun ev-muzeyinə baxmışlar.
######
Bölmənin digər xəbərləri
