Türk Şurası və ÜST əməkdaşlığı möhkəmləndirirlər
Bakı, 7 dekabr, AZƏRTAC
Ümumdünya Səhiyyə Təşkilatının (ÜST) Avropa Regional Bürosunun (ARB) rəhbəri doktor Hans Henri Kluge və Türk Şurasının Baş katibi Bağdad Amreyev iki təşkilat arasında bu ilin sentyabrında imzalanan anlaşma memorandumunun həyata keçirilməsini müzakirə ediblər. Sənəd sağlamlıq və əməkdaşlıq naminə vahid fəaliyyət planının yaradılmasını nəzərdə tutur.
AZƏRTAC ÜST ARB-yə istinadla xəbər verir ki, iki günlük məsləhətləşmələr zamanı tərəflər, ümumdünya səhiyyə əhatə dairəsi, peyvənd yolu ilə hamının sağlam həyatının təmin edilməsi və üzv dövlətlərdə qeyri-yoluxucu xəstəliklər barədə danışıblar.
Nəzərdə tutulmuş planların həyata keçirilməsini asanlaşdırmaq üçün Türk Şurasına üzv dövlətlərdə ÜST-nin əlavə əməkdaşlıq mərkəzlərinin yaradılmasının zəruriliyi xüsusi vurğulanıb.
Türkmənistan, Azərbaycan, Qazaxıstan, Qırğızıstan, Macarıstan, Özbəkistan və digər ölkələrin İsveçrədəki nümayəndəliklərinin rəhbərləri ilə brifinq keçirilib, ÜST-nin Türk Şurasına üzv olan ölkələrdəki nümayəndələri tərəfindən məruzələr edilib.
Doktor Hans Kluge çıxışında ÜST-nin Avropa Regional Bürosu ilə Türk Şurasına üzv dövlətlər arasında əlaqələrin yüksək səviyyədə olduğunu qeyd edib.
Bölmənin digər xəbərləri
